MPCC-in budget zirchianna buatsaih

Nimin khan Mizoram Pradesh Congress Committee (MPCC) Media department chuan Aijal Club-ah 'Mizoram Budget Zirchianna' tih thupui hmangin 2020-21 Mizoram budget zirna leh sawihona hun an buatsaih a, MZU Economics department aṭangin Dr James LT Thanga'n budget chungchang a sawifiah.

Budget zirchianna hun hi MPCC Media chairman Lallianchhunga'n kaihruaiin, Dr James LT Thanga chuan Mizoram sorkarin Second State Finance Commission a din vat angaih thu sawiin,"Tunah a period (2020-25) a inṭan tawh si a, tuna kan la din lo a nih chuan rural local body aṭanga cheng vbc 93 lo lut 50% sem dan tur hi eng tin nge kan kalpui ang? Tunah chuan sorkar kutah a awm a, eng tin nge kalpui a nih ang tih hi ngaihtuah tham a ni," a ti.

Dr James LT Thanga chuan kum 2020-21 ah 'development holiday' a thleng a ngem tia zawhna siamin, "Hmasawnna hnathawhna tur capital expenditure hi 2017-19 chhung khan a pung zawngin a kal a, a san lai ber chu 2018-19 niin cheng vbc 2544 a tling. Kum 2020-21 ah chuan cheng vbc 1693 dah a ni," a ti a, sorkar inrelbawlna senso (Revenue Expenditure) pung chak lutuk leh hmasawnna thil thar dinna (capital outlay) tlahniam chak lutuk chu a ngaihṭhat thlak loh thu a sawi.