Reiek tlang kâng ṭhelh mit thawkhat

Reiek tlang chhehvel chu March 24, Nilaini aṭang khan a kâng a, nimin lamah pawh a la kâng zel a, nimin tlai lamah erawh chuan an ṭhelh mit thawkhat nia thu dawn a ni.

Thu dawn danin, March 24 chawhma dar 10 velah West Lungdar leh Reiek ram inrìna bul, West Lungdar ram lam aṭangin kângmei a chhuak a, Reiek leh Ailawng mipuiin ṭhelh tum mah se, an ṭhelh thei lo. West Lungdar lam epa Reiek tlang hnuaia khâm vel a kâng kai a, Ningani zan khan Reiek tlang chhip bul a kàng thleng tawh a ni.

Kàngmei hi khâm tlâk lamah a kai zel a, nimin zing khan Zairum tlang khàm a thleng tawh. Reiek khawtlang chuan nimin khan Reiek tlanga ngaw, 'Zo thei huan' a kan tel loh nan vèn bakah, kangmei chu ṭhelh tumin hma an la a, mi eng emaw zat an thawk chhuak.

Reiek Branch YMA President hnen aṭanga thu dawn danin, Reiek tlang leh a chhehvel kâng hi nimin tlai lam khan an ṭhelh mit thawh khat a, hmun ṭhenkhata lian tham loa la kâng awm mah se, a hlauhawm tawh lohah an ngai a ni. Nimina kâng ṭhelhnaah hian Chief Secretary leh DFO-te pawhin an ṭawiawm a ni.

Ailawng khua pawhin Ningani zan khan an khaw rama nauban hmun, Orchid Park an veng a; nimin khan kâng ṭhelh turin mi ṭhahnem tak an thawk chhuak bawk a ni.