Pûkpuia Engineering College tur sak tawh MZU Southern Campus atan hman tum a ni

Lunglei Pûkpui dái, Arsi ram chhunga din mek Mizoram Engineering College (MEC) chu sak zawh tawh ni mah se, a taka college ṭan hun tur hriat theih a ni lo a; Mizoram University (MZU) Southern Campus atan hman rih tum a ni.

MEC hi March 24, 2021 khan Lungleia MJA General Conference-a kal palaite'n a hmunah an tlawh a, in sak tawhte an enfiah. MJA-in an tlawh lai hian sorkar hotu (official)-te leh a satu company-te an awm lo a, chowkidar-te'n an lo dawngsawng. MEC chanchin ziaka an tarlanah, MEC chu Mizoram sorkar hnuaia engineering college hmasa ber tur a nih thu an tarlang a, "A hma thei ang berin zirna kalpui vat beisei a ni. Zirna ṭan turin a tlem berah cheng vbc. 11.18 vel mamawha chhût a ni a, tun sorkara flagship programme SEPD aṭanga beisei mek a ni," an ti.MEC-ah zirna ṭan mai theih a beiseiawm loa ngaih a nih avangin MZU Southern Campus ram tihfel leh mamawhte tihfel a nih hmaa MZU hnuaia zirna bul ṭan nan (temporary campus atan) hman tum a ni a, Higher & Technical Education (HTE) department pawhin a thuphungin a pawm tawh. Chutih rualin, MEC chu engineering college tura duan a nih avangin, MZU Southern Campus atan hman lailâwk a nih pawhin, engineering course pakhat tal kalpui tel turin MZU hotute hnenah thlen a ni.

Hetih lai hian, tun hnaia chief minister Zoramthanga'n Lungleia thuthar thehdarhtute a kawmnaah, MEC tihpuitlin chu a hautak thu te, state sorkar sum ringawt chuan a harsat thu te, sorkar laipui (RUSA) aṭangin in sakna tur sum chauh dawn a nih thu te, thawktute hlawh tur, enkawl zuina tur leh ṭul dang hrang hrangte sorkar laipui aṭangin hmuh a nih loh thute a sawi tih, Lungleia MJA member-te chuan an sawi. Thuneitute'n MEC chanchin ziaka an tarlan danin, MEC hmunah hian in pariat sak zawh a ni a; Academic Block, Administrative Block, Workshop-cum-Laboratory, Girls’ Hostel, Boys’ Hostel, cafeteria, Library leh Students’ Common Room/Recreation Centre-te a ni.

RUSA Guidelines-ah, classroom leh zirna kaihhnawih inte chauh RUSA sum hmangin sak theih a ni a, tun thlengin tui leh power supply a la awm lo a, a panna kawng ṭha siam a la ni lo. Thawktute chenna tur (quarters) a awm lo bawk. Hengte hi state sorkar tum tura ngaih a ni a, Mizoram sorkarin hma a la ve zel niin an tarlang. A panna kawng, km. 2.31-a thui siam turin PWD (Lunglei Division) chuan DPR a siam a, senso atan cheng nuai 640 mamawh tura chhût a ni. Tuizém (water reservoir) litre 3,00,000 dawng mamawh tura ngaih a ni a, cheng nuai 206 mamawh tura ngaih niin, PHE department-in DPR an siam tawh. Kawlphetha lak luh nan 11 kV line leh 500kVA, 11/0.415 kV distribution transformer a ngai a, Power & Electricity department chuan cheng nuai 72.25 sên ngai turin an chhût bawk.

MEC-ah hian engineering course pathum - Civil Engineering, Electrical Engineering leh Mechanical Engineering-te zir theih tura ruahman a ni a, bul ṭan nan Civil Engineering course kalpui phawt tura ruahman a ni. Zirtirtu leh thawktu dangte hlawh atan te, classroom leh laboratory bungraw leina, hostel mamawh leh office mamawh atan kum khatah cheng nuai 343 vel a ngai dawn niin Mizoram RUSA chuan an chhût a ni. MEC-ah zirna ṭan a nih theih nan Higher& Technical Education (HTE) department chuan Mizoram budget 2019-20-a an demand-ah MEC pualin budget an siam a; thawktute hlawh tur bakah, tui leh electric supply atana mamawhte nen cheng nuai 622.30 ruahmanin, Finance department-ah an thlen a ni. HTE-in an budget/demand-a telh turin dil mah se, tun thlengin budget-ah telh a la ni lo. A panna kawng siamna tur sum an dil pawh tun thlengin pek a la ni lo.

Zirtirtu quarters 21 sakna atan Rs. 10,10,00,000 (nuai 1000), campus hungna & cheina atan Rs. 2,01,00,000 (nuai 201) leh multipurpose hall, gymnasium leh futsal ground siamna atan Rs 7,19,25,000 (nuai 719) ruahmanna an siam chu 15th Finance Commission-ah an thlen tawh bawk.