Zawlnuamah BCM biak-in a kâng

Nimin zing khan Zawlnuam Vengpuia Baptist Church of Mizo­ram (BCM) biak-in chu a kâng a, bungrua chuh hman loin a kâng ral. 

Zawlnuam Vengpui BCM hruaitute hnen aṭanga Vanglaini thu dawn danin, kângmei a chhuak tih biak-in bul hnaia mite'n zing dar 2:30 velah an hria a, mipuiin ṭhelh tum mah se, an ṭhelh thei lo. Kângmei chhuah chhan hriat a ni lo a, BCM hruaitute chuan kawlphetha kal sual bâk puh tur an hriat loh thu an sawi. 

BCM kohhran chuan nimin khan hnatlangin kângmei sûlhnu an senghawi a, khawtlang hruaitute'n an pui. Zawl­nuam Vengpui BCM-ah hian member 200 vel an awm a, biak-in kâng ta chu kum 1996-a an luah ṭan a ni.