Central service-a tling tlem chhan Kan nawmsak vang - R Lalzirliana

Nimin khan Saitual District Research Officer's office hawn a ni a, office hawngtu awi bialtu MLA minister R Lalzirliana chuan, central service-a Mizote tlin theih loh chhan pakhat chu an nawmsak vang a nih thu a sawi.
R Lalzirliana chuan, "Zo fate zingah central service-ahte tling an tlèmna chhan pakhat chu rualawh nachang hre lo khawpin Zo fate hi Pathianin min siam nuamsa a ni. Rethei bakberh lutuka khawlaia chêng kan awm lo. Kan ram hmasawnna leh hlawhtlinnate hi sorkar, kohhran, khawtlang leh mipui ṭan rualna vang a ni," a ti.
Covid hripui léng karah Mizo nun ze mawi - tlawmngaihnain mual a lo la liam lohzia a takin a lang nia  sawiin Minister chuan, "Ramri leh tualchhung veng him tura ṭhalaite an duty dan te, pastor leh rawngbawltute pawhin theihtawp an chhuah dante a ropui tak zet a ni," a ti a; hripui lakah fimkhur zel a pawimawh thu a sawi.
R Lalzirliana chuan, tun hnaia district thar pathum piangte chu kum 1998-a district panga hawnte nena khaikhinin an vannei a, hma an sawn chak hle tih a sawi a, "Saitual district lo piannaah hian a paitu ngeiin nau a hring hi a hlimawm tak zet. Hemi atana Chief Minister leh sorkar hmalaknaah lawmthu ka sawi a ni," a ti.
Inkhawmah hian Economics & Statistics director Dr Lalrinchhana'n DRO office pawimawhna leh an hnathawh dan kalphungte a sawifiah a ni.