KHAWTHLIR

Nimin Assembly Session-ah MNF mem­ber Lalrintluanga Sailo private member resolution 'Tuikuk mahni duhthua Mizoram chhuahsan ta te, Tripura state-a awm nghet tura kan Chief Minister zahawm tak hmalakna lo hlawhtling ta hi a lawmawm kan ti' tih chu chief minister Zoramthanga duhdana tidanglamin 'Bru mahni duhthua Mizoram chhuahsan ta te, Tripura state-a awm nghet tura kohhran, NGO, political party hrang hrangte leh kan Chief Minister zahawm tak hmalakna lo hlawhtling ta hi a lawm­awm kan ti' tih chu pass a ni.

Ministry of Jal Shakti, Jal Jeevan Mission in thingtlang khaw tina tui thianghlim hniang­hnar leh belhchian dawl khawfai nih dan tur a ruahmanna thar zirna, India ram hmun tina neih tura  tih chu Aizawl district-a rural area tan a kharna hun nimin khan PHE conference hall-ah buatsaih a ni. Training-ah hian tui thianghlim hnianghnar, belhchian dawl  nei tur chuan tui hnar humhalh nasat lehzual a ṭulzia leh fai leh thianghlim reng tur chuan kan duh tawh loh bawlhhlawh sakhat  leh tui chhiate senghawi ṭhat a ṭul ziate inzirtir a ni.

INC member Nihar Kanti Chakma zawhna chhangin Agriculture minister C Lalrinsanga chuan kum 2019-2020 chhungin SEDP hnuaia Agriculture department hmalakna tur atan cheng nuai 529.88 dah a nih thu House a hrilh, "Hma­lakna tur project atan beneficiaries thlan mek a ni a, report kimchang neih theih thuai beisei a ni," a ti.

Lallunghnema, Charity Lodge lehkhabu buatsaih 'Consumer-te ṭhian' tih chu nimin khan Food Civil Supply & Consumer Affairs minister K Lalrinliana'n Aizawl Press Club-ah a tlangzarh.

Chite Veng branch YMA chuan Ningani zan khan an dincham kum 25-na, silver jubilee an lawma, bialtu MLA Robert Romawia Royte leh bialtu councillor PC Lalhmingthangate'n an hmanpui. Robert Romawia chuan YMA chu kohhran, chhungkua leh mimal tana pawl ṭangkai a nih thu a sawi. Jubilee lawmnaah hian Chite Branch YMA hruaitu hlui mi 39 chawimawina hlan an ni.