KHAWTHLIR

Tumkau Ni
Naktuk Pathianni hi Tumkau Ni a ni a, Covid-19 lêng avangin Tumkau chawia Isua chawimawia kawngzawh a awm dawn lo. Tumkau Ni hi nikumah pawh khan hripui léng avangin hman a ni tawh lo bawk. Mizoram Synod chuan Tumkau Ni-a thupui tur a siam a; thupuite chu chawhnu inkhawmah 'Isua chu lal a ni' tih leh zan inkhawmah 'Lal Isua Jerusalem-ah lal angin a lut' tihte a ni.

MSCU office hawng
Cooperation minister C Lalrinsanga chuan March 25, Ningani khan Bara Bazar, Dawr­puiah Mizoram State Cooperative Union (MSCU) office leh Training Centre in thar a hawng. Minister chuan, Mizoramah co-operative a ṭhan chak chuan ram sum leh pai dinhmun vawrh sanna tur a nih thu a sawi. 

Ngopa block tlawh
Rural Development minister Lalruatkima chuan nimin khan Ngopa BDO pisa a tlawh. Ngopa RD Block hi kum 1974-a din a ni a, a hnuaiah khaw 13 - Ngopa, NE Khawdungsei, Chiahpui, Khawkawn, Mímbung, Teikhang, Hliappui, Saichal, Pàwlráng, Làmzawl, Hrianghmun, Changzawl leh Kàwlbêm khuate a awm a ni.

HSLC exam thlir
Mizoram Board of School Education (MBSE) chairman JH Zoremthanga hoin nimin khan Lunglei High School-ah HSLC leh HSSLC Examination 2021 atana Lunglei, Lawngtlai leh Hnahthial district-a centre superintendent 26-te an ṭhukhawm a; Covid-19 hri léng laka himna tura MBSE exam kaihhruaina leh hriat tur pawimawhte an zirho.

MJA resolution
March 23, 2021-a MJA General Conference chuan resolution an siam a; "Advertisement kaihhnawihah mumal zawka sorkar department-te nen kan thawhho theih nan Mizoram sorkarin Inter Departmental Media Coordination Committee a din tawh, function mumal tawh lo hi harthawh a, changtlung zawka a kal leh theih nan hma lak ni se, advertisement chungchang hi bawhzui nghal rawh se," an ti a ni.