COVID-19: Mizoram dinhmun Hripui vei mi 6 hmuh belh a ni

March 25, Ningani khan Mizoramah Covid-19 vei mi paruk hmuh belh a ni a, kumin March thla chhunga hmuh chhuah tam ber ní a ni. Nimin khan hripui laka fihlim tawh chhuahtir an awm lo.
Covid-19 vei hmuh thar parukte chu ZMC laboratory-a hmuh mi pakhat leh Rapid Antigen Test hmanga hmuh mi panga an ni a; TrueNAT-PCR hmanga swab sample endik zingah hripui vei an awm lo.

Ningani khan ZMC laboratory-ah swab sample 20, TrueNAT-PCR hmangin Siaha leh Hnahthialah sample pali leh RAT hmangin district pakuaah sample 695 endik a ni a; sample endik zawng zawng chu 719 niin, chu'ng aṭanga Covid-19 positive hmuh chhuah paruk chu 0.83% a ni.
March 25, 2021 thlenga Mizorama swab sample endik tawh zat chu 2,49,029 a ni a, chu'ng aṭanga Covid-19 positive hmuh tawh zat 4,460 chu 1.79% a ni. Hripui vei hmuh tawh zinga mi 2,128 chu Mizoram chhunga kái chhâwng an ni a, mi 2,332 chu Mizoram páwn aṭanga an rawn luh hnua hmuh chhuah an ni thung.
Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,659 hmuh chhuah a ni tawh a, TrueNAT-PCR hmangin 674 leh RAT hmangin 1,126 hmuh chhuah a ni tawh.

Copvid-19 vei hmuh tharte
ZMC-a hmuh chhuah:
BSF - 1: Mipa kum 35, BSF-a Mizo doctor, positive a hnimhnaih vanga inkhung lai, symptom nei lo.

RAT hmanga hmuh:
Seling - 2: Mipa kum 62 leh hmeichia kum 25, pafa; March 12, 2021-a Delhi aṭanga an haw haw hlima endikah an negative, a hnuah symptom an neih avanga Aizawla private hospital pakhata endiknaa hmuh chhuah an ni.

Ramhlun North - 1: Mipa kum 29, Guwahati aṭanga haw, Lengpui Airport screening point-a hmuh chhuah, symptom nei lo.

Salem Veng - 1: Mipa kum 33, Guwahati aṭanga haw, Lengpui Airport screening point-a hmuh chhuah, symptom nei lo.

Chaltlang - 1: Hmeichhia kum 38, Guwahati aṭanga haw, Lengpui Airport screening point-a hmuh chhuah, symptom nei lo.