Dikna leh dik lohna inbeihna a ni - ZPM Vice President

ZPM vice president Rev. Dr K Thanzauva chuan, Serchhip biala by-election neih tur chu dikna leh dik lohna inbeihna leh thim leh êng inbeihna a nih thu a sawi. 
Rev. Dr K Thanzauva hian nimin khan Khatla South YMA Hall-a Aizawl West-III ZPM Block inthlan a hmanpuinaah thu sawiin, politics-a a luh chhan chu dikna tungding turin a nih thu a sawi a, "Serchhip bial by-election kan hmachhawn dawn a, kan tan chuan Serchhip bial by-election hi dikna leh dik lohna, thim leh êng inbeihna a ni. Hman lo chung pawhin dikna tungding tura beihpui thlaknaa tel ve turin ka pên chhuak ve dawn a ni," a ti.
By-election a ngaih chhan chu MLA aṭanga Lalduhoma bàntir vang a nih thu sawiin K Thanzauva chuan, "Hemi chungchang hi chhui leh zir chian pawh ngai loin chiang takin a dik lo a ni. Ram dana kan sawifiah dan chu eng pawh ni se, Pathian thu aṭang pawhin a dik lo tih a chiang a, chhia leh ṭha hriatna fîm tak aṭanga ngaihtuahna pawhin a dik lo a, Mizo nunphung a kalh a ni," a ti a; Lalduhoma bàn a nih dan chu zahthlâk a tih thu a sawi.
Dr K Thanzauva chuan, IPS officer ṭhin Lalduhoma chu Mizoramah remna leh muanna a awm theih nan India Prime Minister in nuam tak chhuahsanin Mizoram politics thlalerah a vâkvai tih sawiin, "Pathianin training a pe nasa hle. Lalpa'n Mosia a ko ang khan Mizoram hruai chhuak turin Lalpa'n Pu Lalduhoma hi a ko a ni. Zo fate hian Aigupta sal ata min hruai chhuak a, ram tiam lam pana kalphung thara min hruaitu tur kan mamawh a ni," a ti.