Congress a sorkar loh chuan Ram a ngaihtuahawm ṭhin - Lalsawta

Congress party vice president Lalsawta chuan, Mizoramah Congress a sorkar loh chuan Mizoram a ngaih­tuahawm ṭhin niin a sawi.
Nimina Congress Bhavan-a political session-ah thu sawiin Lalsawta chuan, "Kan ram dinhmun a chhiat hian tu mah kan him dawn chuang lo a, chuvangin, a siamṭhatna kawngah tute mah tlanchhe loa kan thawhho a ngai," a ti.
Lalsawta chuan, ZPM-in an dinhmun siamṭhatna atan mipui khawngaihna an dil ṭhin tih sawiin, "Angel vár rual awmna, mi thianghlim rual awmna báwm siam an tum ṭhin. Mahse, han en chiang ila, enchhin tawh, lo tisual ve tawh ṭhin, pamham ve tak tak, thawhpui harsa ve tak takte awm khawm a ni ve tho si," a ti a; Congress party chuan mi ṭha leh mi thianghlim báwm siam an tum lo a, kalphung dik hnuaia mi tu pawh an ṭhat loh theih lohna tur báwm siam an tum niin a sawi. 
MPCC Vice President chuan, kalphung a dik chuan mi ṭha lote pawh an ṭha lo thei lo nia sawiin, "Congress-in báwm thar, kalphung thar siam kan tumah hi chuan ZPM báwm, mi ṭha tlemtê lenna tur ang ni loin, Mizoram mipui zawng zawng kan leng vek dawn a ni,” a ti.
Thusawitu dang MPCC general secretary TT Zothansanga sawi danin, Congress sorkar laiin corruption case 239 zinga 211 chinfel a ni a, 154 chu hrem an ni a, mi 57 ngaihdam an ni.