Tuiphal Group YMA inkhawmpui

Tuiphal Group YMA chuan nimin khan Chiahpui community hall-ah conference an hmang. Khuallian Lalruatkima, minister of state chuan, YMA chu Mizo hnam darthlalang, Mizo hnam humhimtu leh mi zawng zawngin an thlamuanpui a nih thu a sawi.
Lalruatkima chuan, tun hma chuan nu leh pate'n fate an zilhna ṭawngkamah 'Lehkha i zir loh chuan hna i thawk ang' an tih ṭhin thu sawiin, "Tunah erawh chuan hna thawk thiam turin lehkha i zir tur a ni, tih hi kan sawi dan tur a ni tawh zawk. Ṭhangtharte thinlunga thiam tura inngaihna leh inrintâwkna tuh a ṭul a, lehkha thiam theite leh infiamna lama talent nei ṭhate chu nu leh pa mai bakah khawtlang pawhin kan puih a, kan chher hriam a ṭul," a ti.
Tuiphal Group YMA-ah hian branch pasarih - Chiahpui, NE Khawdungsei, Khawkãwn, Làmzawl, Ngopa, Ngopa Hmarveng leh Ngopa Chhimveng branch-te an awm a; an inkhawmpuiah hian chawhnu lamah ro an rél a, hruaitu thar an thlang bawk.