Lalduhoma hêktu MNF MLA 12-te Thinlung takin kan ngaidam - ZPM. ''Session-a Serchhip bialin aiawhtu a nei ta lo kha a khawharthlak'' - Duhoma

Zoram Peoples' Movement (ZPM) chuan Inrinni khan Serchhip biala Assembly by-election awm tur atan Serchhip leh Thenzawlah campaign hawnna leh candidate puanna inkhawm an buatsaih. ZPM hruaitute chuan, Lalduhoma hêktu MNF MLA 12-te chu thinlung taka an ngaihdam thu an sawi a; Lalduhoma chuan Assembly session hnuhnung bera Serchhip bialin dinsaktu leh aiawhtu a nei ta lo kha khawharthlak a tih thu a sawi.

ZPM candidate Lalduhoma chuan, kum 2018 inthlanpuiah bial pahnihah thlan tlin a nih thu sawiin, "Bial chhuahsan zawk tura thutlukna siam a harsa khawp mai. Kan hruaitute lû pawh a hai. A tlangpuiin hetiang hunah hian chak tamna zawk an vawng zui ṭhin a, Aizawl West-I ah vote 1,063-in ka chak a, Serchhip biala ka chakna chu vote 410 a ni," a ti. 

Lalduhoma chuan Aizawl West-I chu a chenna hmun, a lu nghahna tur a nih thu sawi­in, "Chhuahsan harsa ka ti a, bial mipuite pawh an zahawm. Party hruaitute nen ngun taka ngaihtuah a nih hnuah ZPM policy a tak taka kalpui theihna tur hmun chu Serchhip bial hi a nih avang leh ramlái malsawmna hâi chhuak turin kan thlang ta a ni," a ti a, bial tan theihtawp a chhuah nghal thu a sawi. 
Serchhip bialah a rilru a pêk ngheh thu sawiin Duhoma chuan, "Serchhip bialin kan duh tawh lo che an ti a nih loh chuan hmun dang pan ka tum tawh lo. NGO leh kohhrante nen kan thawhhona a ṭha a, bial hmasawnna tur kan ngaihtuah mek laiin min bàn ta thut a ni," a ti. 

Lalduhoma chuan, amah thlang tlingtute a phatsan loh thu sawiin, "Zoram mipuiin kan bial hi min thlir ṭhup a, rorelna dik lo nemnghettu leh sûttu kan ni thei. By-election satliah a ni lo, political history kan siam dawn," a ti a; Serchhip bial mipuite chu ngaihtuahna fím tak púa vote thlâk turin a sáwm. 
MLA aṭanga bàn a nih hnua Court-a an kal loh chungchangah Lalduhoma chuan, "Court-ah kal ila, tun term chhung hian chinfel a nih ka ring lo. High Court zawhah Supreme Court-ah an zualko leh tho ang. Serchhip bial hian MLA a neih leh vat duhin kan hruaitute'n mipui court-a kal an thlang ta zawk a ni. Session hnuhnung bera Serchhip bialin dinsaktu leh aiawhtu a nei ve ta lote kha a khawharthlak hle," a ti.

ZPM president mawhphurhna la mektu vice president K Sapdanga chuan, Lalduhoma hêktu MNF MLA 12 chuan an duh rêng vanga ti an ni lo tih sawi­in, "Thuneihna kan chang ve a nih pawhin MLA 12-te chungah hian phuba kan la hauh lo ang. Thin­lung takin kan ngaidam a ni," a ti a; diriam taka kut inthlakna a awm tawh loh nan thil tih theihna ni loin, khawngaihnain hnehna chang se a duh thu a sawi. 

ZPM Vice President chuan, kum 2018 MLA inthlanah an party-in sor­karna siam se chu Lalduhoma chu chief minister tur a nih thu sawiin, "Sorkarna kan chan zawh loh avangin sorkar khalh ngíltu lamah a awm ta zawk a ni. Sorkar khalh ngiltu pawimawh a ni a, sorkarin an ngaitheilo a, hnawk an ti. Mi dangte pawh an la vau zui. Mipui mitmei véng miah loa awm an duh vang a ni," a ti.

MNF sorkarin Lalduh­oma chauh ni loin, Serchhip bial mipui an hrem tel tih sawiin Sapdanga chuan, "A tuartu chu bial mipui an ni. Kâwi tinah tiam theih zawng zawng an tiam leh tawh. Min hremsaktute nge min hremsaka hian min khawngaih tih vote hmangin kan sawi dawn," a ti a; Serchhip bial mipuiin an bial tana ṭhahnemngai taka ding an thlan leh ngei a beisei thu a sawi.

ZPM campaign hawnna leh candidate puanna inkhawm hi MPF kaihhruainaa neih a ni a, ZPM Val Upa Council leh an party hruaitu hrang hrangte pawhin thu an sawi a ni.