MNF sorkar tihngheh a ni zel dawn - MNF President

MNF president Zo­ram­thanga chuan In­rinni khan Khawzawlah thu a sawi a, "Serchhip bial by-election-ah Pathian leh mipui zarah hnehna chan ngei kan inbeisei. MNF sorkar hi tihngheh sauh sauh a ni zel dawn," a ti.

MNF party chu râwt chimih tuma beitute lakah Pathianin kum 60 a hruai tawh tih sawiin MNF President chuan, "Malsawmna tinréngin min vûr zel. Second khat chauh pawh a hming kan la thlak ve lo," a ti a; kumin October-ah MNF diamond jubilee (kum 60-na) urhsûn taka lawm turin an inpuahchah mek thu a sawi. 

Zo­ram­thanga chuan, ZPM chu tui anga nghet lo an nia sawiin, "Kalphung an tithar zing lutuk a, mipuiin zui ngaihna an hre tawh lo. ZONET leh Vanglaini hi nei lo ta se, an ral titih tawh ang. An khuangpui rinráwl ber leh an tawtawrawt rî hi a chuai tial tial a, an thupuan mipuiin awih chin tâwk an nei tawh," a ti. 

Congress party chung­chang sawiin MNF Pre­sident chuan, "MLA ni lai leh, an MLA hlui eng emaw zatte Congress chhuahsan mai turin an nghîng luai luai tawh. Minority Tuikuk leh Takam takngial pawhin Congress hnâwl nachang an hre tawh," a ti a; MLA inthlan lehah Congress chu an artelukàwn mai theih thu a sawi a ni.