T Dumzau-ah in 25 a kâng ral

March 27, Inrinni zing dar 9 vel khan Lawngtlai district-a T Dûmzau khuaah chenna in 25 a kâng ral a, a tam zawk chu bungrua chuh hman lohin a kâng ral. Mihring thi an awm lo a, hliam tênau nei erawh an awm thung.

Thu dawn danin, T Dûmzau khuaah hian in 70 vel a awm a, a tam zawk chu a bang dâp leh a chung dí a ni. An khaw ṭhenawm, Hmawngbuchhuah rama lo neite'n lo an hâl a, chuta ṭang chuan T Dumzau khuaa inte a kâng kai nia hriat a ni.

Kângmei ṭhelh tumin T Dûmzau khaw mite bak-ah, Hmawngbuchhuah, Laitlang leh Zochachhuah mite an thawk chhuak a; Lawngtlai aṭangin District Disaster Management Authority pawhin aiawh an tir nghal a, silpauline leh mamawh dang eng emaw zat an pe nghal. Lawngtlai Bazar Branch YLA chuan ei leh in tur leh mamawh hmasa tur ṭhahnem tak kengin T Dumzau an pan nghal bawk.

Assam Rifles sipaite pawhin chhawmdawl hna an thawk nghal a; ei leh in tur ṭhahnem tak an pek bakah, hliamte hnenah first aid an pe. Bialtu MLA C Ngun­lianchunga chuan nimin khan T Dumzau khua hi a pan bawk a ni.