Myanmar ráltlân sâng an tling tawh Tuipuiralah 400 chuang an awm mek
Myanmar ram buaina avanga sahimna zawnga Mizorama tlânchhia zinga mi 400 chuang chu Tuipuiràl huam chhunga khaw 10 velah an awm mek a, Mizoram hmun danga awmte nen chuan ráltlân mi sang khat an chuang tawha ngaih a ni.
Mizorama ráltlân zinga a tam zawk chuan Tuipuirala khuate an pan ṭhin. Tuipuiral Group YMA-in an chhinchhiah dan chuan, Myanmar aṭanga ráltlân hi Farkawnah mi 330, Vaphaiah mi 40, Thekte-ah mi 59, Thekpuiah mi paruk, Khuangthingah mi 15, Khawbungah mi 11, Sesihah mi 11, Samthangah mi pali leh Zawngtetuiah mi pahnih an awm mek. Ráltlânte chu Thantláng, Tlangpui, Dawn, Zángtlâng leh Tahan aṭanga kalte an ni.
Myanmar aṭanga Mizorama ráltlânte chu Covid-19 laka an him leh him loh endik nan Health minister Dr R Lalthangliana’n Farkawn YMA hnenah RAT kit eng emaw zat a pe a, chumi hmang chuan an swab sample endik an ni ṭhin.
YMA Tuipuiral Group hruaitute leh Farkawn Joint YMA hruaitute'n Vanglaini palai an hrilh danin, ráltlânte chu Tuipuirala khaw 10 velah an awm tawh a, tun dinhmunah an vaiin mi 400 chuang an ni. Mizo mikhual inthlen danin an mikhual a, chumi hnuah hmun dang an pan leh ṭhin. Civil Disobedience Movement (CDM) mi leh sate chuan ramri hnaih chu a him loa an hriat avangin Aizawl an pan tlangpui.
Mikhual ngah ber leh dawngsawng tam ber Farkawn Joint YMA president Lalmuankima chuan, sorkarin ei leh in lamah ṭanpui zel se an duh thu sawiin, "Min rawn pan tlat chuan inhnar chi a ni lo a, lêt leh tura tih chi pawh a ni lo,” a ti. YMA, Tuipuiral Group Secretary pawhin, Mizo mikhual inthlen anga inthlen reng chu an zawh loh hun a awm theih avangin ráltlânte tan relief camp siam mai an duh thu a sawi.
Lalmuankima chuan, a tìrah CDM thláwptu mi 116 an mikhual a, a hnuah civil mi leh nunaute an thlen leh thu sawiin, "Chhungkuaa lo kalte an awm a, in luah turte kan zawnsak a, in 10 vel chu an luah tawh; a dang chu Mizo pa mikhual danin kan sem darh. Mikhual nei chhungkua 200 vel kan ni. Rawn thleng thar apiang inhriattir zel turin kan ti a, an rawn thleng deuh reng a, a zat chiah hriat a har. Kan neih ang ang kan eiho a ni ber. Ṭiauah Burma sipai an duty tawh si a, kìrtir ngam chi a ni lo," a ti.
Mizoram sorkar hotute'n an ngaihsak leh ngaihsak loh zawhna chhángin Lalmuankima chuan, "Supply Minister-in buhfai quintal 37 vel lei tur a ruahman a, Champhai District Truck Owners Association-in buhfai bag 30, alu bag 10, dailuah bag 4 leh tél case 10 min rawn pe a, Farkawna kohhran hrang hrangte'n pawisa min pe bawk," a ti a; ṭanpuina petute chungah an lawm thu a sawi.
Farkawn Joint YMA President chuan, "Sorkar hian camp emaw, refugee centre sak emaw a harsat a nih pawhin, an ei leh in tur hi a pawimawh. Kohhran lian vak lo inkhawmpuia palai kal ṭha ang kan ni a, kan mualpho loh nan buhfai leh ei leh in tur hi min ngaihtuahpui zel a ṭul," a ti.
YMA, Tuipuiral Group secretary B Challianngura chuan, "Relief camp siam kan duh a, in ruakahte kan dah a, lirnghing vanga tawmna kan siamte pawh a la awm a, in pakhata tam tak awmte pawh a buaithlak thei a, sem rual zel an ngai,” a ti a; Mizo pa mikhual dana inmikhual ringawt chu a fuh reng lo thei tih a sawi.
CDM mi leh sa, Farkawna awm ngam lote chuan Aizawl an pan a, an kalna atan bialtu MLA Ramthanmawia’n Rs. 1,00,000 a pe tawh a, MLA C Ngunlianchunga'n Rs. 20,000 a pe tawh bawk. Chung sum chuan lirthei hmangin Aizawl pantir an ni.