Hnathawk chhunzawm tawh rih lo turin Serchhip YMA-in kawng zauhtute an ngen

Serchhip Sub. Headquarters YMA hnuaia Vigilance & Monitoring Committee hruaitute chuan tun hnai khan Keiṭum leh Bungtlang inkar kawng NH 54 zauhna tura hnathawh mek an tlawh a, hnathawktute chu hnathawk chhunzawm rih lo turin an ngen a, NHIDCL lamah pawh an hnathawh chungchang hi thlen an tum.

Serchhip YMA hruaitute chuan hna hi BPIL-te thawh a nih thu sawiin, "An hnathawh kan en zinga a tam zawk chu a chhia a, lirthei tan pawh la hlauhawm thei tur a ni. Chuvangin hna chawlhsan rih turin kan ngen a, kan thil hmuh dante NHIDCL-ah thlen kan tum," an ti a, hnathawh zawh tawhte pawh siamṭhat an phut dawn thu an sawi.

Keiṭum VC te pawhin kawng zauhna hmun hi an tlawh a, hnathawh hi a tir aṭangin an lo sawisel tawh thu sawiin, "Company lama thuneitute bakah sorkar thuneitute lamah pawh kan thlen tawh. Lungremte chu a ding lutuk a, tun aia awih (slope) turin kan lo ngen tawh a ni. Kan ngenna hian awmzia a nei lo a ni," an ti.

Serchhip aṭanga thudawn danin, Mizorama NH. 54 laihzauh leh siamṭhat hna thawh mekah hian hmun tam takah chuan kawngpui zauhna atan kawng chhaklam laih a nih bakah kawng thlanglamah lung rem a ni.

Tun hnai khan Keiṭum leh Bungtlang inkarah hian kawng siam hna thawktu company lamin tui chawina atana an hman truck (Hyva) pakhat, lungrem hmanga kawngpui dawl zawla ding chu lungrem hian zo lovin a chim a, truck  hi kawngthlang-ah thui tak a lum a, nunna chan an awm lo. 

Helai hmunah hian lungrem hi ft. 20 vel zet chimin a bula lungrem ṭhenkhat chu a khik avang leh a foundation a ṭha tawk lo nia a lan avangin company lam hian ft. 20 vel zet chu an ṭhiah belh. Hetiang a nih avang hian hnathawh chu Serchhip YMA-te hian an enfiah a ni.