Pûm 2021-a pakhatna Dengrikhuma

Labour, Employment, Skill Development & Entrepreneurship (LESDE) department-in ITI Complex-a an buatsaih, ni thum awh 'Pûm 2021: Mizoram Innovation Fair' chu March 26, 2021 khan khàr a ni a; intihsiaknaa tel zingah Dengrikhuma, Tuithiang, Aizawl chu pakhatna niin, Rs. 1,00,000 a dawng.

Pûm 2021: Mizoram Innovation Fair khàrna inkhawmah hian LESDE minister Lalchhandama Ralte chu khuallian a ni a; Mizoram Youth Commission chairman Dr Vanlalṭanpuia pawh a tel. Minister chuan, Fair chu kum dangah pawh buatsaih chhunzawm tlak a nih thu a sawi.
Fair-ah hian ITI zirlai te, zir chhuak tawh te, Women’s Polytechnic zirlaite leh Mizoram hmun hrang hranga thiamthil neite'n an thil siamte an pho chhuak a, ni thum chhungin mi sang khat chuangin an tlawh. Firm leh company neitute'n an thil siamte indawrna siampui tura sàwmna dawng pawh an awm a ni.

Pûm 2021: Mizoram Innovation Fair-ah hian trade 10 hmangin mi 23 an inel a; Dengrikhuma, Tuithiang chu guitar siam hmangin pakhatna niin, Rs. 1,00,000 leh trophy a dawng. Pahnihna Gospel Lalfakzuali, Mission Vengthlang, bakery & confectionery trade-in Rs. 50,000 a dawng a, pathumna Zochansangi, Lunglei Rahsi Veng, food processing trade-in Rs. 30,000 a dawng.

Top 10-a tlingte'n Rs. 10,000 leh certificate an dawng ṭheuh a; Zochhuanmawia, ITI Veng, tank overflow controller siamtu chu People’s Choice Award hlan a ni a, ITI-a zirlai mek tana siam Special Award chu Deborah Lalnunsiami, bakery & confectionery trade hnenah hlan a ni bawk.