COVID-19: Mizoram dinhmun Vaccine la tawhin hripui a kái

March 26, Zirtawpni khan Mizoramah Covid-19 vei mi pathum hmuh chhuah a ni a, Inrinni khan mi pahnih hmuh belh leh a ni bawk. Inrinnia hmuh chhuah pakhat zawk chu Covid-19 vaccine la kim tawh a ni. Inrinni khan mi pahnih chhuahtir an ni a, niminah chhuahtir an awm lo. 

Hripui vei March 27, Inrinnia hmuh thar zinga pakhat chu nurse niin, Covid-19 laka invenna damdawi (vaccine) Covishield la kim tawh a ni.

Thu dawn danin, Republic Venga nurse hian vaccine course/ dose khatna chu January 28, 2021-ah a la a, March 2-ah dose hnihna a la leh bawk.   Covid-19 vei March 26-a hmuh chhuah mi pathumte chu RAT hmanga hmuh chhuah an ni a, ZMC laboratory leh TrueNAT-PCR hmangin hmuh a ni lo. Inrinnia hmuh belh mi pahnih chu ZMC laboratory-a hmuh chhuah a ni a, TrueNAT-PCR leh RAT hmangin hmuh chhuah a ni lo.

Mizoramah Covid-19 vei mi 4,465 hmuh chhuah a ni tawh a, mipa 3,254 leh hmeichhia 1,211 an ni. Nimin tlai dar 5 thleng khan mi 4,428 (99.17%) chhuahtir an ni tawh a, mi 11 (0.25%) thi tawhin, enkawl mek mi 26 (0.58%) an awm.

March 26, Zirtawpni khan ZMC laboratory-ah swab sample 52 leh RAT hmangin district 10-ah sample 578 endik a ni a, TrueNAT-PCR hmangin endik a awm lo. Sample endik zawng zawng chu 630 niin, chu'ng aṭanga Covid-19 positive hmuh chhuah pathum chu 0.48% a ni.

Covid-19 vei Zirtawpnia hmuh chhuahte chu mipa kum 21 leh 28 mi leh, hmeichhia kum 45 mi an ni a, state páwn aṭanga rawn lut, Lengpui Airport screening point-ah RAT hmanga hmuh chhuah an ni. Mipa pahnihte chu Railways-a thawk an ni a, hmeichhia chu State Bank of India meeting, Bangalore-a tel haw lam a ni thung a; symptom nei lo vek an ni.

March 27, Inrinni khan ZMC laboratory-ah swab sample 40 leh RAT hmangin district pasarihah sample 1,365 endik a ni a, TrueNAT-PCR hmangin endik a ni lo. Sample endik zawng zawng chu 1,405 a ni a, chu'ng aṭanga Covid-19 positive hmuh chhuah pahnih chu 0.14% a ni.

Inrinnia hmuh thar mi pahnih zinga pakhat zawk chu nurse hmeichhia kum 30 mi, damdawi-ina thawk a ni a; hri a kàina hriat a ni lo a, symptom a nei lo. Pakhat dang chu Tlangnuam, Aizawla mipa kum 45 mi, tun hnaia Kolkata aṭanga haw a ni a; a haw hlima Lengpui Airport-a endiknaah a negative a, a hnuah symptom a neih avangin endik leh niin, hripui a kái tih hmuh chhuah a ni.

March 27, 2021 thlenga Mizorama swab sample endik tawh zat chu 2,51,064 a ni a, chu'ng aṭanga Covid-19 positive hmuh tawh zat 4,465 chu 1.78% a ni. Hripui vei hmuh tawh zinga mi 2,128 chu Mizoram chhunga kái chhâwng an ni a, mi 2,337 chu Mizoram páwn aṭanga an rawn luh hnua hmuh chhuah an ni thung.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,661 hmuh chhuah a ni tawh a, TrueNAT-PCR hmangin 674 leh RAT hmangin 1,129 hmuh chhuah a ni tawh.