KHAWTHLIR

Thisen pe
Inrinni khan Bethlehem Vengthlang YMA-in Aizawl Civil Hospital tan thisen unit 67 an pe a, petute mipa 57 leh hmeichhia 10 an ni a; Vaivakawn Branch YMA pawhin an golden jubilee pualin a thawh hnih nan pe lehin, Synod Hospital tan mipa 49 leh hmeichhia pariatte'n unit 57 an pe. ṬKP Coordination, Aizawl bultumin Kanan unit-a mi 15, Aizawl West unit-a mi 16 leh Hunthar unit-a mi 11-te'n Aizawl Civil Hospital tan an pe a; Mizoram PYD, Bazar bialin unit 6 an pe bawk. ṬKP, Lawngtlai Bazar unit pawhin District Hospital tan unit 12 an pe a, petute mipa pasarih leh hmeichhia panga an ni.

Covid-19 zirtir
Assam Rifles-te chuan March 27, Inrinni khan Siahatla-I community hall-ah Anti Corona Preventive Measures lecture an buatsaih. He hunah hian tualchhung mi 36 telin, Covid-19 chungchanga hriat tur pawimawhte an inhrilhfiah a ni.

SRH-ah mi 8 awm
State Referral Hospital-ah nimin khan Covid-19 vei mi pakhat dah luh a ni a, ani nen hripui vei enkawl mek mi pariat an awm. SRH-ZMC Bulletin tarlan danin, mi pariat zinga pakhat chu ICU-ah enkawl niin, ventilator hmantir mek a ni a; mi dang zawng Isolation ward-ah awmin, harsatna lian tham nei an awm lo. Mi pariat zingah hian kum 60 chung lam pahnih an awm a ni. 

Minister-in hawng
Health minister Dr R Lalthangliana chuan March 26 tlai khan Zoram Medical College-ah Viral Research & Diagnostic Laboratory, Animal House, MRI & CT Scan Centre leh Community Medicine And Clinical Skills & Advance Learning Centre Building a hawng. Health Minister chuan ZMC chu Medical Council of India-in an duh hun hunah an endik ṭhin avangin inring reng a,  theihtawp chhuah zel a pawimawh thu a sawi. MRI khawl hi cheng vbc. 8.9 senga dah niin, CT Scan khawl atan chuan cheng vbc. 4.45 sen a ni. Building hawn takte hi cheng nuai 178.4, nuai 50 leh nuai 73.9 senga sak a ni.