Bru-te vote thlaktir tum dan duh loin NGO-te'n April 8 aṭangin Mizoramah Total bandh an huaihawt dawn

NGO Coordination Committee (Joint NGO) hruaitute nimina Central YMA Committee Room-a ṭhukhawm chuan, April 11, 2019-a Lok Sabha inthlanpui awm turah Tripura relief camp-a Bru-te tana a bika vote thlakna tur, Kanhmuna special polling station siam tum a nih duh loh lantirna atan leh Bru-te chu vote an neihna polling station-ah ngei vpte thlaktir phût nan April 8 aṭangin tiamchin awm loin Mizoramah total bandh huaihawt an rêl.

Joint NGO chairman Vanlalruata chuan, CYMA president chuan, March 12, 2019-a an meeting ṭumin Tripura relief camp-a Bru-te chu vote an neihna polling station ṭheuha vote thlaktir an nih theihna atana hmalak an lo rel tawh thu a sawi a, "A hranpaa an vote thlakna tur polling station siam hi kan remti lo. Tunah hian Bru-te vote thlakna atan Kanhmunah polling station 15 siam tum a ni. Mizote pawh vote thlak turin vote kan neihna hmun kan pan mai ṭhin," a ti.

Vanlalruata chuan, Bru hruai kîr hna ṭum riat kalpui a nih tawh thu sawiin, "Union Home Minister kaihhruaina hnuaia Ministry of Home Affairs, Tripura leh Mizoram sorkar bakah, Mizoram Bru Displaced People Forum (MBDPF) ten inremna an siam vek hnuah pawh, inremna aṭanga inhnûkdâwkin an lo kîr duh lo. Notified class of voter an nihna pawh hlih vek a ni tawh a, special treatment pek theih an ni tawh lo," a ti a; Bru-te chuan Mizoram mipui leh sorkar an tihbuai ngun tawh thu a sawi.

CYMA President chuan, MLA inthlan dawna Election Commission of India (ECI) hotute an lo kal ṭumin Joint NGO-te'n Chief Election Commissioner (CEC) hnenah, Tripura-a Bru-te Mizoram electoral roll aṭanga paih tura an ngen thu a sawi a, "CEC chuan Model Code of Conduct a awm tawh avanga tih theih a nih loh thu leh, inthlan zawhah sorkar thuneitute'n hma an lak theih thuin min chhang. Tuna CEC pawh hi khami ṭum khan a awm a, kan thusawi a hre vek a ni," a ti.

Inthlan zawhah CEC thusawi chu an bawhzui nghal tih sawiin Vanlalruata chuan, "Hnatlang koin, Bru-te electoral roll aṭanga paih an nih theihna atan form la chhuakin, paih an nih theihna tur form kan thehlut. District-a thuneitute'n kan form thehluh chungchangah chief electoral officer (CEO) Ashish Kundra an ráwn a, ani'n ECI lam a râwn ve leh a, ECI chuan paih an remti lo a ni," a ti a; paih tura an ngenna hnâwl a nih laia Bru-te roll-a inthun dilna ṭhenkhat pawm a ni leh si chu hriatthiam har an tih thu a sawi. Joint NGO Chairman chuan, Bru-te chungchang chu tihtawp a hun tawha an hriat thu a sawi a, "A nih nih kan ni ang a, he chapter hi khâr kan duh tawh," a ti.

Joint NGO secretary Lalhmachhuana, CYMA secretary sawi danin, April 8-9 chhungin Lok Sabha inthlanpui leh Assembly bye-election atan inbuatsaihna hnuhnung Mizoram hmun hrang hrangah neih tur a ni a, chuvang chuan April 8 aṭangin total bandh huaihawt ṭan an rel a ni. Inthlan atana official te, sipai leh inthlan atana hmanraw phurhna atana mimal leh sumdawng lirthei hman zawng zawngte pawh hmantir tawh lo turin mimal leh pawl hrang hrangah ngenna siam a ni ang.

NGO Coordination Committee chuan thuchhuah siamin, "Tuikuk awm ṭha duh lo vawi tam tak Mizorama lêt tura tih pawha lêt duh lote vanga harsatna Mizo mipui leh Mizoram sorkarin a tâwk ngun ta lutuk hi NGO Coordination Committee chuan pawi a ti a, hetiang hi a tàwp theih nan Mizo mipuite ṭangruala April 8 aṭanga total bandh Mizoram puma buatsaih tur hi thláwp vek turin Mizo mipui a beisei tak meuh a ni," an ti.