Mizoram inthlan a ni tawh lo, India ram inthlan a ni - Lalnghinglova

Lok Sabha inthlanpui awm tura mipui candidate Lalnghinglova Hmar chuan nimin khan Aizawl khawpui hmun hrang hrangah street campaign a neih chhunzawm a; Lok Sabha inthlan awm tur chu Mizoram inthlan ni loin, India ram inthlan a nih thu sawiin, mipuite rilru fîm nena duhthlanna siam turin a sáwm.

Congress leh ZPM thlâwp inde­pendent candidate Tetea Hmar chuan, Lok Sabha chu India rama roreltu thlanna a nih thu sawiin, "Tun ṭum hi India ram inthlan a ni a, Mizoram inthlan nen hriat pawlh lo ang u. Lok Sabha inthlan a nih avangin party nihna dahṭhain, Mizo ram, hnam leh sakhaw himna turin vote i thlak ang u," a ti.

Lalnghinglova Hmar chuan amah vote turin MNF mi leh sate a sáwm a, "MNF unaute hi kan do lo a, kan sawisel hek lo. Tun ṭum Lok Sabha inthlan tur hi chu India rama roreltu tur thlanna a nih avangin NDA-BJP lo lam vote an duh ṭhahnem tak an awm ngei ang tih kan chiang a, chuvangin, NDA-BJP lo lama bán phar tur mipui candidate lam vote turin kan sáwm a ni," tiin mipui vote a ngen. 

Ṭhalaite khawvel tia sawi sawi ṭhin chu kalpui turin ṭhalai ngei an ṭhat tur thu sawiin Lalnghinglova chuan, "Ṭhenawm state-te pawhin MP atan ṭhalai thlan nacháng an hria a, an hlâwk­pui hle a ni," a ti a; Mizo mipuite chu Mizo ṭhalai ring ngam turin a chah. Lalnghinglova Hmar chuan, MP atana thlan tlin a nih chuan lo neitute ham­ṭhatna atana hma a lak tur thu sawiin, "Agriculture hi state chan ni mah se, lo neitute hmasawnna turin MP-in tih theih tak tak a nei. Ka ngaih pawimawh chu sik leh sá, ruahtui leh awmna hmun azira thlai leh thei chîn tur thlan thiam a ni a, chumi zirtirtu tura mithiam chah chhuah a, hmun thlan bika bul ṭan ka tum," a ti. 

Mizoram mipui chu an vote thlak tur ngun taka ngaihtuah tura sáwmin Tetea Hmar chuan, "In EVM tawpah khan NDA-BJP Prime Minister tur a chuang palh ang e, ngun taka ngaihtuahin vote i thlak ang u," a ti a; inlungrual taka BJP-NDA sorkarna titawp tura beih chu Mizo Kristian nih nen thil inhmeh tak a nih thu a sawi. Lalnghinglova Hmar hian nimin zing karah Reiek leh Ailawngah thu a sawi a, chhunah Ramhlun North, Zarkawt, Temple Square, Vaivakawn leh Sikulpuikawnahte thu a sawi leh a ni.