MLPC Act La hman hrih a ni
Election Commission of India (ECI)-in The Mizoram Liquor (Prohibition) Act, 2019 (MLP Act) hman a la phal loh avangin The Mizoram Liquor (Prohibition & Control) Act, 2015 (MLPC Act) hman rih a la ni.
Tarlan tawh angin, Mizoram Assembly House-ah zu khapna dan MLP Bill pass a nih hnuah March 26 khan Mizoram Governor Prof. Jagdish Mukhi chuan pawmpui a, dan puitling (act) a ni tawh. Mahse, ECI chuan Election Model Code of Conduct hman lai a nih avangin MLP Act chu bawhzui leh tihpuitlin a la phal rih lo.
Excise & Narcotics department (END) hotute hnen aṭanga Vanglaini thu dawn danin, MLP Act hman theih a la nih hrih loh avang hian MLPC Act hman chhunzawm rih a la ni. Hetih lai hian, MLPC Act hnuaia zu zawrh phalna leh zu lei phalna licence pek chhuah zawng zawng chu March 31, 2019 khan a tawp a; hei vang hian END chuan warehouse leh wineshop zawng zawngte chu an kalh nghal. Zu la hralh zawh loh erawh a awm nual nia thu dawn a ni.
MLPC Act hnuaiah hian phalna nei loa zu zawrh leh phalna nei loa zu in khap a ni a; tun dinhmunah chuan MLPC Act hnuaiah zu zawrh phalna leh zu in phalna licence nei an awm tawh lo.