Vote thlâk vek turin mipuite sawm

April 11, 2019-a Lok Sabha inthlanpui awm tura returning officer (RO) Vanlalngaihsaka, Aizawl DC/DEO chuan thuchhuah siamin, inthlan lo awm turah vote thlak ngei turin mipuite a sáwm.

Returning Officer chuan, India khua leh tui zawng zawngte'n India danpui hnuaiah dikna leh chanvo an neih thu sawiin, "Heng dikna leh chanvote hi sorkar kut leh ke hrang hrang hmanga humhalhsak kan ni. Heng zinga pawimawh ber pakhat chu universal adult franchise (India khua leh tui dik tak, kum tling tawhte tana Inthlanna a vote an thlak theihna) chanvo hi a ni. Hemi humhalh tur leh chanvo neitute'n an chanvo an chan ngei theih hi Election Commission of India duh dan leh tum ber a ni," a ti.

ECI-in universal adult franchise chanvo nei zawng zawngte tan ram hruaitu turte inthlanna a buatsaih dawn tih tarlangin RO chuan, "India khua leh tui, kum 18 tling tawh zawng zawngte electoral roll-a inziak lut tura ngen an ni. PVC EPIC i dawng tawh a nih chuan electoral roll-ah i hming ziah luh a ni tawh tihna a ni. Chuvangin, Lok Sabha inthlan April 11-a neih turah vote thlak ngei turin ka ngen a che," a ti a; vote thlak hi India khua leh tui nih anga mawhphurhna a nih thu a sawi.