Inbumna laka fimkhur turin chah

Mizoram Police chuan thuchhuah siamin, tunlai hian mi bum hmangte'n sum hlawh nei tam deuhte buma pawisa laksak an chîng tih an tarlang a, fimkhur turin mipui an chah.

Police-in thuchhuah
Ṭhalai kum naupang lam leh nupui/pasal nei lote bum an tum zual bik.

Social media hrang hrang (Facebook, Instagram, matrimonial website, etc.)-ah an bum duhte an ṭhianah an siam phawt ṭhin.

Inṭhian ṭhatna/intih rinawmna turin thla 6 vel lai pawh inkawmna hlimawm lamin hun an hmanpui phawt ṭhin.

Social media kaltlang hian an ṭhian tharte contact number leh detail an dil ṭhin.

Eng emaw chen hnuah, hun remchang nia an hriat ve leh dinhmun ṭha lo leh laklawh taka ding mek leh pawisa nei lo (airport security paltlangna turin fee/tax pek ngai tur nei lo ang te, dan kengkawhtute emaw hnena a thil tih sual vanga excise/custom/fee, etc. pek ngai) anga insawiin ṭanpuina sum hman sak lawk an dil ṭhin.

Mi tam takin bum an ni dawn tih hre miah lo leh rilru ṭha púin chu'ng mite bank account-ah chuan pawisa an thawnsak fo.

Hetia pawisa thawn reng reng chu ATM card hmangin rang takin an la chhuak nghal a, harsatna dang sawi belh zelin a tam thei ang ber laksak tumin dâwt an sawi belh ṭhin. Mi tam takin vawi 3-4 thlenga a nuai téla thawn pawh an awm. Rinhlelhna a awm tih an hriat ve leh biak pawh theih loin an awm zui a, mobile phone, Whatsapp leh social media site-a an relation pawh an titawp zui nghal ṭhin.