CEO-in thu sût turin Joint NGO a ngen "Vote tla ang angte chhiar tho a ni ang" - CEO

Mizoram chief electoral officer (CEO) Ashish Kundra chuan nimin khan NLUP Conference Hall-ah thuthar thehdarhtute kâwmin, NGO Coordination Committee-in Lok Sabha inthlan a nih lohna tura April 8 aṭanga tiam chin awm loa total bandh an huaihawt tur chu vanduaithlak a tih thu a sawi a, NGO-te chu an thu sût turin a ngen. Dan pangngaiin inthlan theih ni lo mah se, vote tla ang angte chhiar a nih dawn thu a sawi.

Ashish Kundra chuan, "Joint NGO-te thutlukna hi a vanduaithlak ka ti a, keimah bik pawh min tina hle a ni. Media-te min thawhpui turin ka ngen che u a, NGO-te'n an thu an sût theih nan ṭan min lakpui turin ka ngen che u a ni," a ti. Election department lamin Lok Sabha inthlan leh a kaihhnawih atan theihtawp an chhuah thu sawiin, "Thil ṭha ber kan duh a, Bru-te tan pawh ruahmanna kan siam a, a hmain Joint NGO-te nen pawh kan inbia. Kohhran hotute pawh kan sawipui a, anni pawhin inthlan boycott loh ni se an duh a ni," a ti a; inthlana vote thlak chu mipui dikna chanvo a nih mai bakah, mawhphurhna a nih thu sawiin, Parliament-a Mizoram aiawhtu tur mipuiin an mi duh tak an thlan a ngaih thu a sawi.

Joint NGO-in total bandh huaihawt an tum thu an puan hnua Election Commission of India (ECI) aṭanga thu an hmuh dan zawhna chhangin Ashish Kundra chuan, "ECI-in thil awm dan an thlir reng a, min vil reng, kan inbe pawp reng. State sorkarah pawh a ṭul angin direction an pe ang," a ti.

Total bandh vangin Mizoramah vote thlak theih ni lo chungin, postal ballot hmanga vote thlak tawhte chhiar a nih dawn leh dawn loh zawhna dang chhangin CEO chuan, "Vote thlak ang ang chhiar a ni ang a, result pawh puan a ni ang. Hetiang hi Jammu & Kashmir leh hmun dangah pawh a awm tawh a, 10% chiah vote tlate pawh chhiar a lo ni tawh ṭhin," a ti a; Mizoram páwna inthlan duty-a kal police company ruk velin postal ballot-in vote an thlak tawh thu leh, bandh ni mahse service voter mi 3,000 - 4,000 ten vote an thlak theih tho a rinawm thu a sawi.

Joint NGO-te thil phût ṭhenkhat sawifiahin Kundra chuan, NGO-in Bru voter 8,000 vel paih dilna an thehlut a, mahse, tihhlawhtlin theih a ni lo tih a sawi. A sawi danin, dan ang leh ECI guidance angin, hlâwm lian taka voter paih dilna pawm a ni ngai lo a, inthlan kumah tam thamin a hlawma voter paih (mass deletion) a awm ngai lo.

Bru-te tan a hlawma Kanhmuna electoral roll revision tihsak chungchangah, Bru camp-a roll revision ti turte NGO-te'n an dan avangin an kal theih lo a; chuvang chuan, Kanhmunah ko khawmin hearing tih a nih thu a sawi a, "Mzorama a vawi khatna atan a hlawmin Kanhmunah hearing kan ti a, mi 2,000 chuang an rawn kal a, mahse, mi 160 vel chauh dilna pawm a ni," a ti.

Ashish Kundra chuan, Mizo sentiment a hrethiam tih a sawi rualin, "Prisoner of law kan ni a, danin min phuar a, dan anga kan tih a ngai," a ti a; ECI dan anga thawk tur an nih thu a sawi. Mizoram CEO chuan, Bru tana Kan­hmuna a bika vote thlakna tur siamsak chungchangah, Assem­bly general election-ah pawh inbiak­remna hmangin Kanhmunah vote thlaktir an ni a, Bru mi 6,000 chuangin vote an thlak thu a sawi a, "MLA election leh MP election inkarah thla li a tla chauh a, thil inthlak danglam a awm vak lo. Mizo sentiment ka hriatthiam rualin, tunah Kanhmunah vote thlaktir an phal tâk loh chhan hi ka hrethiam lo," a ti.

Ashish Kundra chuan, inthlan chu Bru chungchanga sorkar nawr nan NGO-te'n an hmang em ni, tia ngaih theih nia a hriat thu sawiin, "Bru repatriation leh Bru issue hi chu thil dang a ni a, Mizoram sorkar, Tripura sorkar, Ministry of Home Affairs leh Bru pawlte khawih tur a ni a, election hi chu thil hrang a ni," a ti a; Joint NGO-te leh Mizo mipuite chu hnam dang laka Mizo hnam mawina leh hmingṭhatnate tichhe lo turin a ngen.

CEO Ashish Kundra chuan, kum 2014 Lok Sabha inthlanpuia Joint NGO-te thil phûta ECi intiamna chungchangah, "Bru-te Mizoram páwna vote thlaktir loh tura ECI intiamna chu tihhlawhtlin a ni a, Mizoram chhungah vote thlaktir an ni. An awmna polling station ṭheuha vote thlaktir tih hi chu intiamnaah a tel lo a ni," a ti.