BJP thawhpuitu Congress leh Duhoma - Zorama

MNF president Zo­ramthanga chuan, BJP thawhpuitu chu MNF ni loin Congress leh Lal­duhoma niin a sawi a; MLA hlui PP Thawlla chu MNF party-ah a lawm lut.

Zoramthanga hian nimin khan Lawngtlai dis­trict leh Siaha dis­trict-a khaw hrang hrang fangin, Lawngtlai Areo­pagy, Kawlchaw, Siaha Zero Point leh Siaha Vengpuiahte thu a sawi a; NEDA leh NDA chu thuhmun a nih thu sawiin, "Congress duh lo zawng intêlkhawmna a ni. Pu Duhoma hi NDA-ah keini aiin a tlatlum daih zawk. Aizawl North-III MLA bye-election ZNP-in BJP an thawhpui a, AMC inthlanah an thawhpui leh a, CADC-a sorkar siamho pawh Congress leh BJP tho an ni," a ti.

MNF President chuan, LADC, MADC leh CADC sorkar kal dan chu mipuiin ṭha an ti loa a rin th sawiin, "Sor­kar hnathawkte'n harsa taka mipui chhiah pek tlingkhawm inthei­bawngsem ṭhin ngawt hi Conduct Rules phuar zawhah kan enfel ang,"a  ti a; sorkar dikah mipuiin hmasawnna an hmuh theih nan an enfel tur thu a sawi.

Citizenship Amend­ment Bill chungchanga hma la nasa ber chu MNF an nia sawiin Zorama chuan, CAB dodalna vanga hma a lak dan a sawi a, "Pu Hawla leh Pu Duhoma hian Kolkata bak CAB chungchangah an la thleng lo. Keini party tluka CAB do nasa leh hma la nasa an awm lo," a ti. 

Zoramthanga chuan, Congress party chu zu zawrh nuam ti leh châk zek zekah puhin, "Kan sorkarin zu zawrh kan titawp ang kan tih angin, sorkar tuk ni hnih/khat hnuah 'dry day' kan puang nghal. Zu zawrh zel chu an châk ngang a ni ang, Court-ah min khing a, Court chuan March 31 thleng zawrh a phalsak a ni," a ti a; Assembly session-ah zu khapna tur dan an pass tawh thu a sawi.

MNF President hian nimin khan Siahaah hian Congress, MDF, BJP leh party dang aṭangin mi eng zawm zat a lawm lut a, chung zingah chuan Mara Democratic Front (MDF) dintu leh MLA hlui PP Thawla leh MADC-a MDC hlui ṭhenkhat an tel a ni.