UPA a sorkar chuan Lalnghinglova Hmar Dinhmun ṭha takah a awm ang - Zodintluanga

MPCC & ZPM Cam­paign Committee chair­man Zodintluanga, MLA chuan, Lok Sabha inthlanah pawl pahnihte thlâwp mipui candidate Lalnghinglova Hmar a tlin a, UPA an sorkar bawk chuan Lalnghinglova chu dinhmun ṭha takah a awm dawn thu a sawi a; Lalnghinglova Hmar vote vek turin Mizoram mipui a sáwm.

Zodintluanga hian nimin khan Aizawl Press Club-ah thuthar theh­­darhtute a kâwm a; zawhna chhangin, MPCC leh ZPM candidate Lalnghinglova Hmar chu a tling a nih chuan BJP/NDA lo lamah a ṭhu dawn a, United Progressive Alliance (UPA) lamah a ṭhut a beisei thu a sawi a, "Kan candidate hi a tling a, UPA a sorkar bawk chuan Pu Lalnghinglova Hmar hi dinhmun ṭha takah a awm ang a, Mizoram tan a ṭangkai hle ang," a ti.

Kumina Lok Sabha in­thlanpui chu kum dang zawng aiin hnam leh sakhaw himna nen a inzawm tih sawiin Zo­dintluanga chuan, "MP kan thlan chhuah fuh loh chuan Mizo hnam leh sakhuain nasa taka a tawrh phah theih avangin, MP thlan dang zawng aiin tun ṭum hi a pawimawh. Campaign boruakin a vàwrtàwp a thlen mek laiin, BJP notê MNF-te chu an tâlbuai hle," a ti a, MNF-te chu campaign dan an duhtui lo hle tih a sawi.

Zodintluanga chuan, MNF-te chu an candidate fak ngaihna hre lo-ah puhin, "An official can­didate Pu C Lalrosanga fak ngaihna an hriat loh avangin mipui candidate, Congress leh ZPM-in an thlâwp Pu Lalnghinglova Hmar an bei nasa hle. Thu dik kaih lek mai duhtâwk loin, dâwt ngialngan tak tak hmangin a mimal nun tihchhiat vek pawh pawiti loin an bei mek. Hengte hi MPCC leh ZPM chuan pawi kan ti hle a ni," a ti. MNF-te chu an candidate fak ve tur te, an khingpui candidate mimal nun dâwt thu nena báwl phuan tawh lo turin a chah. 

MNF MP Candidate-in Mizoram hmasawnna a ngaihven ngai lo tih sawiin Zodintluanga chuan, "Pu C Lalrosanga’n thla thum chhunga MNF sorkar thar hnathawh leh kum 10 chhunga Congress sorkar hnathawh a inhen vel niin a sawi a. Mizoram hmasawnna a ngaihven ngai lohzia a tichiangah kan ngai a, politics luhchilh vanga thu belh­chian dâwl lo nen bul a ṭan nghal ringawt hi MP ni tlak a nih lohzia tichiangtu a ni," a ti a; Congress sorkar laia hna­thawh hrang hrangte a sawi lang.

MPCC&ZPM Cam­paign Committee Chair­man chuan, MNF president Pu Zoram­thanga’n NDA leh NEDA hmanga BJP nen an inzawm tih chiang taka a sawi ṭhin bakah, March 26, 2019-a Vanapa Hall-a campaign kick-off ah 'NDA member nih kan zak lo’ a tih thu a sawi a; MNF Media, Publicity & IT chairman Liansuama erawh chuan March 30-a press conference-ah MNF candidate thlan tlin a niha a ṭhutna tur a chian loh thu a sawi thung tih a sawi.

Zodintluanga chuan, MNF candidate C Lalro­sanga chu thlan tlin a nih palh hlauh chuan NDA hnuaia awm an nih angin BJP kaihhruai NDA lamah a ṭhut ngei dawn thu a sawi a, "Mizoram tana bill sakei - Citizenship (Amendment) Bill kal­tlangpui tum tlattute lam­ah a ṭhut ngei ngei a ngai tih hre turin Mizoram mipui kan ngen a ni," a ti.

RG Stadium chung­changa zawhna chhangin Sports minister hlui Zodintluanga chuan, RG Stadium chu football khelh nan leh athletics tih nana siam, sorkar ta a nih thu a sawi a, "Ground hman diltu an tam a, MFA lamin foot­ball-ah khelh tur an ngah a, ground hmang tur indah thuah a awm loh nan ground allotment bik MFA kutah dah a ni," a ti. RG Stadium ang thoin sorkarin a siam/sak leh din sport stadium, hall leh court-te chu a kaihhnawih sport association-te kutah dah vek a ni a, a hman dan tur pawh association-te thu a nih thu a sawi.