Zirlaite'n MHTC principal Louise Hauhnar Eiru-ah an puh, sawn chhuah an phût

Mizoram Hindi Training College (MHTC) Adhoc Trainees Union hruaitute chuan, MHTC principal Louise Hauhnar chuan sorkar sum leh trainee-te thawh khawm sum a eiru ngei nia an hriat thu an sawi a; Principal chu sawn chhuah a nih hma chuan sawn a nih theih nan an nawr zui zel dawn tih an puang. 

MHTC Adhoc Trainees Union (MHTCATU) hruai­tute chuan nimin khan Aizawl Press Club-ah thuthar thehdarhtute an kâwm a; MHTC Principal chet dan dik lo hrang hrang an tarlang. MHTCATU president Lalrawngbawla tarlan danin, MHTC zirlaite chu Language Enrichment Course neiin Agra-ah class an kal ṭhin a, kum 2018-ah pawh Hindi B.Ed. (Shikshan Parangat) 2nd. year, Hindi Dl.Ed. (Shikshan Praveen 2nd. year Hindi Shikshak Diploma 2nd. year zirlairte an kal. Chuta tan chuan Mizoram sorkarin zirlai pakhat tan Rs. 2,600 zel hisapin a pe chhuak a ni. 

Shikshan Praveen leh Shikshak Diplo­ma zirlaite chu Sept 19 - Oct 21, 2018 chhungin Agra-ah an kal a, Mizoram sorkarin March 23, 2018-ah mi 74 tan Rs. 1,92,600 a pe chhuak. Mi 74 tana pek chhuah a nih laiin, Arga-ah mi 44 an kal a, mi 44 tanRs. 1,14,400 sen a ni. Agra-a kal lo leh mihring awm lo mi 30-te tan tur Rs. 78,000 pek chhuah tel a ni. Agra-a kalte chu Rs. 2,600 zel pek tur an nih laiin, Rs. 1,500 chiah pek an ni a, Rs. 48,400 (1,100 x 44) chu Principal-in a eiah an ngai. Class pahniha a eirûk zat belhkhawm chu Rs. 1,26,400 a ni. 
 

Shikshan Parangat zirlaite chu November 21 - December 21, 2018 chhungin Agra-ah an kal a, zirlai 32 an kal laiin, zirlai 37 tan Rs. 96,200 lak chhuah a ni. Mi 32 tana sum sen erawh Rs. 83,200 a ni a, mi panga ta tur Rs. 13,000 eiruk a ni. Agra-a kalte chu Rs. 1,500 pek an ni a, pek kim loh zat belhkhawm chu Rs. 35,200 niin, Shi­kshan Parangat bika eirûk belhkhawm chu Rs. 48,200 a ni. Class pathuma eiruk belhkhawm chu Rs. 1,74,600 a tling.

Zirlai admission fee-ah Trainees Welfare Fund atan kum tin Rs. 300 lak ṭhin a ni a, mahse, Princi­pal-in trainees welfare din a phal loh avangin zirlaite thawhkhawm fund awmna hriat a ni lo. Chutih laiin, college-in function a neihah trainee-te'n a hranin sum an thawh ṭhin. Registration fee atan kum tin admission fee-ah Rs. 190 lak tel a ni a, mahse, zirlaite chu registra­tion card siamsak an ni lo. 

Library fee atan admi­ssion-ah kum tin Rs. 300 lak a ni a, library card erawh siamsak an ni lo a, library an hmang ngai lo. 1st. year-ah practical fee Rs. 300 lak tel a ni a, mahse, zirlaite'n 1st. year-ah practical an nei ngai lo. 2nd. year zirlaiteah pawh Rs. 300 tho lak a ni a, mahse, practical tih nan sum hman a awm ngai lo. Practical teaching tia sikula an kal chhuahin, kalna senso mahnia intum a ngai ṭhin.

Student identity card atan admission-ah Rs. 100 kum tin lak a ni a, mahse, zirlaite ID siamsak an ni lo a, Agra course (2nd. year-ah) kal dawnah Rs. 20 vel sênna tur ID card pek an ni. Laboratory fee kum tin Rs. 250 lak a ni a, mahse, Lab-ah trainee-te'n practical an la ti ngai lo a, practical room hawn a ni ngai lo.

Student Aid Fund atan zirlai pakhatah Rs. 50 lak a ni a, mahse, zirlai damlo leh harsatna tâwk an awmin pek chhuah a ni ngai lo. Tun hnaiah zirlaite'n lungawi lohna an lantir hnuah zirlai pali hnenah Rs. 50,000 pek chhuah a ni. Lalrawngbawla chuan, March 5, 2019-a second term exam ṭan ní-ah special fine tiin zirlaite sum a chawitir thu te, sum pe lote exam-na aṭanga a hnawhchhuah thu te, 'In career ka tichhe vek dawn, internal mark-ah 0 in hmu vek ang,' tia a vau thu te, vauna ṭawngkam dang dang a hman nasat thute a sawi. 

MHTCATU President chuan, MHTC Principal chuan Chanmari, Aizawlah LH Hindi School a neih thu sawiin, chuta thawk mek mi pali, MHTC-a zir ve mekte leh a school-a thawk tawhte uchuak taka a duhsak bik thu leh, college sumte chu cashier-in a khawih ngai lo a, Principal-in a khawih vek thu a sawi a, "Agra-a kalnaa a eiruk, zirlai pakhata Rs. 1,100 chu lungawi lohna kan lantir hnuah pek chhuah a tum a, a sikul LH Hindi School-a thawkte chiahin an la chhuak a, mi dang zawngin kan la duh lo," a ti.

MHTCATU chuan, MHTC principal Louise Hau­hnar chu a rang thei ang bera sawn chhuak tur leh a thil tih dik loh leh eirukah a phu tawka hrem ngei turin thuneitute an ngen a ni.