KHAWTHLIR

Dry day puang
Excise & Narcotics Commissioner chuan thupek chhuahin, Mizo­rama Lok Sabha inthlan vote thlak tur avangin April 10 leh 11 bakah, vote chhiar ni May 23-te chu zu dawr hawn, hralh, lei leh in phal loh ni, dry day-ah puan a nih thu a tarlang. Thupek hi Election Commission of India-in a phût vanga chhuah a ni.

Magistrate chêt dan tur zirho
Siaha DC conference Hall-ah nimin khan Lok Sabha inthlan laia Siaha district chhunga sector magistrate-te chet dan tur inhrilhhriatna hun hman a ni. Additional DC R Lalremsanga'n a kaihruai a, Saiha biala Sector Management nodal officer Lalrinawma Khiangte leh Palak biala nodal officer Lalbiakfela ten sector plan an duan chu sector magistrate-te hnenah hrilhfiah.

EVM & VVPAT
Serchhip DC Sangchhin ­Chinzah kaihhruaiin nimin khan Serchhip DC Conference Hall-ah Lok Sabha inthlana hman tur electronic voting machine leh voter verifiable paper audit trail (VVPAT)-te hman theih tura buatsaih a ni. Ser­chhip district-ah hian vote thlakna hmanrua EVM ballot unit (BU) 122, control unit (CU) 121 leh VVPAT 113 kawl mek a ni. 

Tui bill inkawp
PHE department chuan tui bill siam dan thar leh pek dan thar kalpui a, chuvang chuan April thlaah February leh March thla tui bill a rual­in an sem kawp dawn tih an tarlang. Mipui hriatthiamna an ngen a, May thla aṭang chuan thla khat tui bill zela sem leh a ni ang.

MZP-in thláwp
MZP General headquarters chuan thu­chhuah siam­in, Lok Sabha inthlanpui awm turah, Mizoram Bru, Tripura Transit Camp-a awmte tana Election Commission of India (ECI)-in Kanhmunah polling station hranpa siamsak a tum vanga NGO Coordination Committee-in April 8, 2019 aṭanga tiam chin awm loa Mizoram puma total bandh huaihawt an tum chu an thlàwp tlat thu an tarlang. MZP chuan, MZP hnuaia hnam pual zirlai pawl zawng zawngte pawh an awmna huam chhung ṭheuhah a ṭul anga hma la turin an chah a ni.