Mipui candidate-in Modi a PM tawh loh nana vote thlak vek turin mipui a sáwm

Lok Sabha MP inthlan awm tura ZPM leh Congress party-in an thlâwp mipui candidate Lalnghinglova Hmar chuan, MP inthlan lo awm turah vote thlak vek turin mipui a sáwm rualin, Narendra Modi prime minister a nih tawh lohna tura vote thlak turin mipui a ngen.

Lalnghinglova Hmar hian nimin khan Aizawl-Lunglei World bank Road tlangdung khaw hrang hrangah vantlang inkhawm neiin thu a sawi a; MP inthlanah vote a tlak ṭhat ngai loh thu sawiin, "Tun ṭum inthlan chu vote i thlak vek ang u. Prime Minister tur kan thlang dawn a, BJP mi leh sa Narendra Modi a PM tawh lohna atan vote thlak ṭheuh turin Mizo mipuite ka sáwm a che u," a ti.

BJP kaihhruai sorkar hnuaiah Kristiante nêkchêp mek an nih thu sawiin Tetea Hmar chuan, "Ram pawn aṭanga Kristianna kaihhnawih ṭanpuina lo lut tur reng reng dan an tum a, Synod Hospital tihchangunna tur pawh an dang. Vellore-a Christian Medical College-a Kristiante'n quota kan neih pawh hnawksak an ti a, college hmingte thlak an duh hial a ni," a ti a; Kristiante tana BJP hnawksakzia chu missionary-te'n an hriat chian thu a sawi.

Lalnghinglova chuan, a khingpui MNF-te sawisel a tum loh thu sawiin, "MNF hi an sual kan ti lo, mi fel tak tak, kohhran khawtlanga kan rawngbawlpuite an ni. Mahse, tun ṭum chu central lama an zawm a fuh lo. BJP kaihhruai NDA-ah an tel tlat a, chuvangin, kan ram, kan hnam leh sakhua himna atan MNF mi leh sate pawh min vote vek turin ka sáwm a ni," a ti.

MP inthlanah ruling leh ruling lo an la awm loh thu sawiin, "MLA inthlan nen hriat pawlh loh tur. MLA inthlan chu kan zo tawh a, MNF-in sorkarna an siam tawh a, ṭha takin sorkar siam se ka duh. Tun ṭumah chuan central-a sorkar siamtu tur kan thlang dawn. MLA inthlana intiamnate kha chu MP inthlan nen a dang a, sawi pawlh chi a ni lo," a ti a; ngaihtuahna fím tak nen mipui vote thlak turin a ngen.

Lalnghinglova Hmar chuan, MLA inthlanah chuan ZPM leh Congress-te'n chak zawk nih tumin a hranpain theihtawp an chhuah tih sawiin, "Mizoram mai ni lo central lamah pawh tun hmaa inkawp thei lo, inngeih ngai reng reng lote BJP kalphung duh loin an inhlawm khawm a ni. A Hindu ngei ngeite pawhin Hindu lal ram siam tum hi an duh lo," a ti.

State-a ruling party MP neih leh neih lohin awmzia a nei lo tih sawiin Lalnghinglova chuan, "Tu pawh tling ila, MP-te hnathawhna hmanrua ber pakhat MP fund zat a inang vek. A ngaihna hriat chuan MP fund bak sum hâi luh tur eng emaw zat a awm. MP-te hi district tina sorkar laipui scheme-te viltu Vigilance & Monitoring Committee chairman an ni a, state sorkar tih dik lohte huaisen takin ka do ngam dawn a ni," a ti a; central-a BJP lo lam zawnga bán phar tur thlang ngei turin Mizo mipuite a sáwm. Lalnghinglova Hmar hi ZPM leh Congress party hruaitu ṭhahem takin an ṭawiawm a ni.