Dan loa din Tuichawngchhuah MSU-in an pan, an thleng lo

Mizo Students' Union (MSU) General Headquarters hruaitute chu an president Vanlalliana hoin dân loa khaw din Tuichawngchhuah tlawh turin April 1, Thawhṭanni khan mi pariat an kal a; Lunglei sub-headquarters YMA ngenna avangin zan dar 12-ah DC Office-ah district thuneitute nen an inkawm.

MSU hruaitute hi Thawhṭanni zan dar 12 velah YMA Sub-Hqrs, Lunglei leh Lunglei MSU hruaitute'n an lo dawngsawng a; dân loa khaw din Tui­chawngchhuah chu thlen duh mah se, Lunglei YMA hruaitute'n boruak ṭha lo zawk a thlen loh nan kaltlang lo turin an ngen a ni.

MSU hian March 18, 2019 khan press conference neiin, Mizoram sorkar chu March 2019 thla ral hmaa Tui­chawngchhuah khua ṭhiahna thupek (eviction order) siam turin an phût a, March thla a ral hnuah pawh eviction order chhuah a nih loh avangin MSU hruai­tute chu Tuichawngchhuah an pan a ni.