BJP a sorkar leh dawn - JV Hluna

BJP Mizoram Pradesh president Prof. JV Hluna chuan nimin khan Kolasib Press Club-ah thuthar thehdarhtute a kâwm a; Lok Sabha inthlanpuiah BJP-in sorkarna an siam leh ngei dawn nia sawiin, "BJP candidate Nirupam Chakma hi kan thlang tling a nih chuan Union Minister kan nei ngei ang," a ti.

Prof. JV Hluna chuan, Chakma zawng zawng páwng huat ngawt tur an ni lo tih sawiin, "Foreigners Chakma-te erawh dan anga kan hnawhchhuah a ṭul hle. Dan angin sorkar hian hma la mai ila, tuna NGO hrang hrangte'n mutmawh hnàrmawha kan neih hi a reh thei zawk dawn a ni,"a  ti a; Mizo mipuite'n thil tak tak an ngaihtuah a, hmasawnna tluantling an neih theihna tur an inzawh a ngaih thu a sawi.

Citizen Amendment Bill chungchangah JV Hluna chuan, CAB chu 'lapse' tawh a nih vangin siamṭhat a nih loh chuan a ngai anga tharthawh theih a ni lo tih a sawi a, "Hmarchhak tan bik clause hran siam turin kan ngen a, CAB hi a nihna tak kan hriat pawh a ngai. A dan han en hian, duh duh tana rawn luh ngawt theih a ni lo," a ti.

JV Hluna chuan, Lok Sabha inthlan awm tura BJP candidate Nirupam Chakma chu a pa aṭanga Mizote zinga mikhual lo tak, a pa pawh Brig. T Sailo hun laia MLA ṭha tak lo ni tawh a nih thu a sawi a; "Amah Nirupam Chakma pawh Pu Lal Thanhawla hruaina hnuaiah term nga lai MLA a lo ni tawh a, term hnih minister a lo ni tawh. A hun laia Pu Hawla duat leh duhsak a ni," tiin, Nirupam Chakma chu Central-ah pawh mikhual lo tak a nih thu a sawi a ni.