ASAP-in Sava bu siam chawp dah

Association for Environmental Preservation (ASEP) chuan Environment, Forest and Climate Change department sponsor-in Dt. 2.4.2019 (Thawhlehni) bultumin Pi Hangi Lunglen tlangah sava bu siam chawp (artificial nest box) eng emaw zat an dah a, an member ṭhahnem tak an thawk chhuak.

ASEP chuan, tunlai hi savate'n no an neih a, bu an chheh leh no an awp hun lai a ni tih sawiin, "Ramngaw a chereu nasat tawh avangin Aizawl khawpui chheh­velah thing kawrawnga bu chhep chite'n bu chhehna tur an tlachham ṭan a, an harsatna tawh mek phuhrukna atan chuan artificial nest box kan dah a ni," an ti.

ASEP chuan, nungchate tichereutu ni lo a, a humhalh­tu ni ṭheuh turin Mizoram mipui an sáwm a ni.