Kawlphetha man tihsàn a ni Unit khat man Rs. 6.71 a ni dawn
Joint Electricity Regulatory Commission (JERC) for Mizoram & Manipur chuan Mizorama kawlphetha hman man chu 20.68%-a tihsan a remti a, April 1, 2021 aṭangin kawlphetha unit khat man Rs. 6.71 a ni tawh dawn.
JERC aṭanga Vanglaini thu dawn danin, Mizoram sorkar chuan JERC hnenah hian kawlphetha chhit man chu 41.92%-a tihsan a rawt. JERC chuan Mizoram sorkarin kawlphetha chhit man tihsan a rawt chhan hrang hrangte a zir chian hnuah leh mipui aṭanga sawi duh neite thu thlen a ngaihthlak hnuah March 26, 2021 khan kawlphetha chhit man thar a tichhuak a, 20.68%-a tihsan a remti ta zawk a ni.
Power tariff thar chu kum 2021-2022 chhung atan a ni a, April thla (2021) kawlphetha hman man (electric bill) aṭangin rate thar angin hman man lak a ni dawn. Power unit khat man chu Rs. 6.71 ang vel a ni dawn a, a tìra Mizoram sorkarin a rawt angin 41.92%-a tihsan ni se chuan, unit khat man chu Rs. 8.26 vel a ni dawna chhût a ni.
Mizoram sorkar chuan kum 2021-22 chhunga power & electricity inenkawlna senso atan cheng vbc. 659.58 an dil a, mahse, JERC chuan cheng vbc. 478.11 a bituk thung. Power & Electricity department chuan kawlphetha man atan unit khatah Rs. 8.23 zel an mamawh dawn a, mipuiin an pek Rs. 6.71 bâk, Rs. 1.52 chu sorkarin a tum dawn.
Kum 2021-22 chhungin Mizoramin kawlphetha million unit 546.69 vel a nei dawn a, a hman bâng million unit 78.29 chu state páwnah a hralh thei tura chhût a ni. Kawlphetha man hi Mizoram chhung aṭangin cheng vbc. 366.87 leh phai aṭangin vbc. 28.28 hmuh beisei a ni.
Sorkar laipui chuan December 31, 2020 khan dan thar, Electricity (Rights of Consumer) Rules, 2020 a siam a; dan thar ang chuan smart meter emaw, prepaid meter emaw hmang lo chuan connection thar pek a ni tawh dawn lo. Tuna hman mek digital meter pawh smart meter emaw, prepaid meter emawa thlak vek tura hmalak a ni.