Ráltlânte ṭha taka dawngsawng turin CYMA-in YMA-te a ngen

Central YMA chuan, Myanmar buaina avanga sahimna zawnga Mizo­rama lutte chu ṭha taka dawngsawng tur leh mumal taka chhin­chhiah turin YMA sub-headquarters, group leh branch-te a ngen.

YMA Central Execu­tive Committee (CEC) chu March 27, Inrinni zan khan CYMA Comm­i­ttee Room-ah an ṭhu­khawm a, member 56 an tel. Myanmar ráltlân Mizorama lutte chung chang an ngaihtuah a, "YMA sub-headquarters, group leh branch-te chu an huam chhunga ráltlânte ṭha taka lo dawngsawng tur leh mumal taka chhinchhiahna siam tura ngen ni se. Report form siam a, CYMA-ah thehlut tura hriattir ni se, an ti.

Tun hnaiah Mizo­ramah ruihhlo a hluar leh tâk em avangin theih­tawpa ruihhlo do tura ṭan lâk thar CYMA chuan a remti a, hmalak dan tur ruahmanna siam chu office bearer-te kutah an dah. Aizawl khawpui chhunga YMA branch hruaitute infuih tharna leh YMA kalphung inzirtirna buatsaih remtih a ni.

Airfield Branch YMA-in an huam chhunga lung leh balu lâk chungchanga harsatna an tawh chu CYMA chuan a zir chiangtu tur committee an siam a; Riverine Forest Reserve ṭhiah chungchanga Chief Minister an sawipui tawh chu a ṭul anga bawhzui zel ṭha an ti a, bawhzui turin CYMA hnuaia Science & Environment Sub-Commi­ttee-te an ruat. 

Central YMA chuan, T Dumzau khuaa in kângte sak ṭhat hnatlang puih nan Central YLA-ah Rs. 10,000 pek an rél a; Maubawka in kâng tuarte ṭanpuina tur an dawnte chu March thla chhung ngeia pek an rél a, March 27 thlengin YMA branch 41 aṭangin Rs. 6,46,345 an dawng tawh a ni.