BJP MDC parukin MNF an zawm CEM ni lai RM Chakma a báng

Nimin khan Chakma Auto­nomous District Council (CADC) MDC member parukte chuan MNF an zawm a, MNF adviser Robert Romawia Royte chuan Chawngtea Hnam Rûnah a lawm lut. CADC chief executive member ni lai Rashik Mohan Chakma chu nimin khan CEM aṭangin a báng nghal bawk. 

Thu dawn danin, MNF party zawmtu CADC MDC-te chu - Buddha Lila Chakma, Hirand Tongchangya, Sanjeev Chakma, Anil Kanti Chakma, Onish Chakma leh Ajoy Kumar Chakma-te an ni a; heti hian CADC-a MDC 20 awmah MNF-in MDC 18 an nei ta a ni.

CADC CEM ni lai Rashik Mohan Chakma chu nimin khan CEM aṭangin a báng a, hei vang hian nimin vêk khan CADC-a MNF Legislature Party chuan CEM atan executive member ni lai DD Chakma an thlang. DD Chakma hi CEM atan Rashik Mohan Chakma chuan a rawt a ni. 

CADC-a Information & Public Relations department chuan, Rasik Mohan Chakma hi January 21, 2019 khan CEM atan rinawmna thu tiamtira lak luh a nih thu a tarlang.

CADC chairman H Amaresh Chakma chu March 26, 2021 khan bûk a ni a, no-confidence motion a paltlang zawh loh avangin chairman aṭangin paih a lo ni tawh bawk.

MNF zawm thar MDC-te lawm luttu Robert Romawia Royte chuan, Chakma area mipui leh MNF party ni ve lo MDC-te pawhin chief minister Zoramthanga kaihhruai ring a, an party chhuahsana MNF an zawm avangin MNF party an lawm tak zet thu a sawi.