Hlawh pek dan turah Thutlukna la siam lo

Mizoram sorkar chuan sorkar hnathawk group A, B, C leh D-te March 2021 thla hlawh ṭum khata pek nghal vek a nih dawn leh dawn lohah thutlukna la siam lo.

Vanglaini palaiin Finance department aṭanga thu a dawn danin, kum dangah chuan March thla hlawh bik chu sorkar kum thara budget thar hman tawh tur a nih ṭhin avanga insiam remna atana hun hman chhung a rei avangin ni 10 velah pek a ni ṭhin.

Kuminah pawh hlawh hi Aprl 10 velah pek tum a ni a, group A, B, C leh D-te a ruala pek leh pek loh turah erawh thutlukna siam a la ni lo.

Hlawh pek dan turah hian sum awm dante uluk taka thlir chungin thutlukna siam a ni ang.

Tarlan tawh ṭhin angin, Mizoram sorkar chuan sum dinhmunin a zir loh avangin tun hnaiah group C leh D-te hlawh a pe hmasa a, a hnuah group A leh B-te hlawh a pe leh ṭhin a ni.