Tlawng lui tui pump-na khâwl Electric transformer siam ṭha tawh
Aizawl khawpui châwmtu Tlawng lui tui pump-na khâwl atana hman electric transformer chhia chu siam ṭhat a ni tawh. Chutih rualin, a hma anga tui sem danin ngai a awh leh hun tur hriat theih a ni lo.
Public Health Engineering (PHE) department hotute chuan Vanglaini palai zawhna chhángin, Tlawng lui tui pump-na khawl tinungtu atana hman electric transformer chhia chu siam ṭhat a ni tawh a, hman mek a nih thu an sawi a, "Kar thum vel a chhiat avangin Aizawl khawpuia tui sem a khaihlak nasa hle. Tunah transformer ṭha tawh mah se, a chhiat chhunga indaih lohna nasa tak phuhru leh tur chuan hun a la duh rei ang," an ti.
Tlawng lui tui pump tur a awm mang lo nia tunlaia thu léng vel chu belhchian dâwl lo a nih thu sawiin PHE hotute chuan, "Ṭhál lai ni mah se Tlawng lui tui pump tur chu mamawh khawp a awm," an ti a; chutih rualin, an khawlte a hlui tawh avangin a tira ruahman ang a pump theih tawh loh thu an sawi.
Greater Aizawl Water Supply Scheme (GAWSS) Phase I leh II hmangin ni khatah tui litre nuai 250 vel an pump ṭhin thu sawiin PHE hotute chuan, "Khawlin a pump chhuah theih chu tam mah se pipe line-a pût leh eng eng emaw avanga tui hlohte a awm ṭhin a, mipui hnena thleng tak tak chu litre nuai 175 vel a ni tlangpui," an ti.
PHE department chuan tunah hian Aizawl mipui 4,00,000 vel hnena tui sem tur angin an chhût a, tuna tui pump theih zat aṭanga chawhrualin, ni khatah mi pakhat hnenah tui litre 40 vel zel pe ang an nih thu leh mipui khamkhawp a nih loh thu an sawi.
PHE hotute chuan, Aizawl tui pekna tur GAWSS Phase-III chu hna 88% zawh a nih tawh thu Vanglaini palai zawhna chhangin an sawi a, "Tunah hian Vaivakawn-Hunthar-Chanmari chhoa pipe phûm vel hi hna lian zual chu a ni mai. Heng veng neitute nen thil sawi fel ngai a awm avangin hna zawh hun tur hriat theih a ni lo," an ti.
Aizawl mipuite chu fûr ruahtui dah khawlna ṭha nei tur te, renchem taka tui hmang tur leh, in sate chu an mahni bakah an in luahte tana tui dah khâwlna ṭha siam ṭhin tura an duh thu, PHE hotute chuan an sawi bawk.
GAWSS Phase-III hi ni khata tui litre nuai 370 pump chhuak thei tur a ni a, Laipuitlang area leh Aizawl hmar lam zawng a châwm dawn. Ṭawi tlang, Hualtu ram aṭanga Aizawl khawpui chhim lam Hualngohmun thleng châwm turin tui lak tum mek a ni a, km. 66-a thui tui pipe (450mm) phûm hna thawh mek a ni.