Health Minister-in damdawi-in a tlawh

Health & Family Welfare minister Dr R Lalthangliana chuan nimin khan Mamit district-a primary health centre (PHC) leh sub-centre hrang hrang a tlawh a, an dinhmun leh hnathawh dante a enfiah.

Dr R Lalthangliana chuan, thingtlanga sub-centre-te chu kum 2023 ral hmaa tihchangtlun (upgrade) vek tum a nih thu sawiin, "Staff nurse, health worker leh 4th grade mamawh in thlente hi Covid-19 hripuiin min tihbuai zel loh chuan a theih ang anga hnawhkhah kan tum. Quarters mamawhte chu kum thar project-ah thun kan lo tum ang," a ti a; sub-centre leh PHC-te'n Congress sorkar lai aiin MNF sorkarah damdawi an dawng ṭha niin a sawi.

Health Minister chuan, Mamit district chu Aspirational District an nih angin India ramah a ti ṭha ber nih tuma ṭan la turin a chah a, "Aspirational District in nih angin thil tam tak in dawng tawh. Cheng nuai 1700 man Mamit District Hospital sak mek a ni a, sub-centre leh staff quarters eng emaw zat sak mek a ni bawk," a ti a; Bolero Pik-up 11, ambulance pasarih leh two wheeler ambulance-te pek an nih tawh thu a sawi bawk.

Commerce & Industries minister ni bawk R Lalthangliana chuan, Bangladesh nen insumdawn tawnna turah Manit district an pawimawh dawn tih sawiin, "Mizoram aṭangin sawhthing, balhla, aieng leh cubic lung thlengin supply tur kan neih a ngai a, a bikin agricuture leh horticulture lamah ṭan lâk hle a ngai ang. Bangladesh aṭangin textile, garments, plastic leh mamawh dangte lâk luh tum a ni," a ti.