Press mite hmusitah Chief Minister puh

ZPM Ṭhalai chuan nimin khan thuchhuah siamin, chief minister Zoramthanga chu press mite zahlo leh hmusitah an puh a, press mite bei lo tura an chah bakah, an lakah ngaihdam dil turin an phût.

Chanchin thar rintlàk mipui hnena hlui ṭhintu local newspaper pakhat leh cable TV-te chu ZPM party-in a thunun theih angin Zoramthanga'n a sawi tih tarlangin ZPM Ṭhalai chuan, "Press mite zahlohna  leh an hna hmuhsitna lian tak niin kan hria. Rorel lai party hruaitu berin eptu party a beih fo hi a sim thei lo a nih pawhin, press mite leh zel chu bei lo tur leh a thusawi avang hian thuthar thehdarhtute hnena ngaihdam díl turin kan phût a ni," an ti.

ZPM ṭhalaite chuan, CM Zoramthanga chu inenfiah tura ngenin, "Chief Minister dinhmun leh ṭhutthlêng tizahawm lo a, nuihzatthlâka siamtu hian a dik lohna inhmu chhuak a, insiamṭha ngam tur leh, a dâwt sawi tam lutuk avanga amah leh amah zahawm loa a insiamnaah hian mi dang leh press mite puhmawh lo turin kan ngen a ni," an ti a; ama thiam loh vek a nihzia inhmu chhuak ngam turin an ngen.

ZPM Ṭhalai chuan, "Press mite zahawmna humhimtu tur Chief Minister hmûi aṭanga hmuhsitna rawng kai a chhuak ta mai hi a vanduaithlàk kan ti a, tun hnuah thleng tawh lo se tih hi kan duh dan a ni," an ti a; "A beih chanchinbu leh cable TV ngeiin a beihna an chhuah duh hian chanchinbu leh cable TV rintlak an nihzia a tilang. Sawiselnate insiamṭhat nana hman tum lo, haw let tlat ram hruaitu kan nei hi a vanduaithlak hle a ni," an ti bawk.