Hnahthial ṭhalaite'n Jio khawl an titàwp

Hnahthial Ṭhalai Pawl (HṬP) chuan an khuaa Jio sevice ti ṭha tura an ngennain awmzia a neih loh avangin nimin khan an khuaa Jio kháwl an tihtawp (off) sak.

HṬP hruaitute chuan, Jio company hotute aṭanga thu lawmawm an dawn hma chu kháwl an tihtawpsak dawn a, tunkar chhungin thu lawmawm an dawng lo a nih chuan a ṭul dan azirin, Hnahthial khua aṭanga inla chhuak tura nawr thlenga hmalak an tum tih an sawi.

Hnahthiala internet signal chhe lutuk chungchangah hma a la tih sawiin HṬP chuan, Airtel leh Jio company-te chu theihtawp chhuahin an ngen tih an sawi a, "Ṭha tê têa indawr hi kan duh dan a ni reng a, mahse, Jio lam hian mipuite harsatna hi engah mah an ngai lo a, awká an chhuah duh lo a, kan harsatna thlente thu tlingah an ngai lo a, thu lawmawm hriat tur a awm lo a ni," an ti.

Hnahthial mipui harsatna tawh an hriattir fo tawh chunga Jio company-te'n engah mah an ngai lo leh aw an chhuah duh lo chu Hnahthial mipui zahlohna leh thamlohnaa an ngaih thu an tarlang.

HṬP chuan, an thu thlen leh ngenna chu Airtel company erawh chuan chinfel an tum a, Aizawl leh Lunglei aṭangin March 15, 2021 khan an hotute Hnahthialah an kal tih an sawi a; "Hnahthiala internet signal chungchanga harsatna tawhte sawiho a ni a, April 15, 2021 hian an tower-te tihnun vek tura tih a ni. Fûr ruahpui tlak tam hmain kan harsatna tawh thinte chu sutkian a nih tur thute min tiam a ni," an ti a; Airtel company chungah an lawm thu an sawi.