Hnawksak tih vangin Lalduhoma bân a ni  - ZPM Legal Board

ZPM Legal Board hotute chuan nimin khan Serchhip Press Club-ah thuthar thehdarhtute an kâwm a; MLA aṭanga Lalduhoma bàn a nih chhan chu dan ngaihpawimawh vang ni loin, MNF-in hnawksak an tih vang a nih thu an sawi.

ZPM Legal Board secretary Lalnunmawia Pachuau chuan, "Serchhip bialtu Pu Lalduhoma, MLA a nihna aṭanga disqualify a nih chungchangah, dan ngaih pawimawh vang a ni tiin MNF party chuan mipui rilru kawih pèn an tum nasa hle a, amaherawhchu, Assembly House-ah Pu Lalduhoma’n CM Pu Zoramthanga a lepsè hneh em vanga hnawksak an tih lutuk avanga disqualify ta an nihna hi mipuite‘n an hrethiam vek a ni," a ti.

MNF sorkar hmasak laia Peace Bonus tia hriat lâr chu an pu ber phuahchawp liau liau a nih dan te, MNF flagship programme mau, Brandissi leh Latiflorous chungchangah risk an lâk thute chu Lalduhoma zarah mipuiin an hriatthiam thu te, chungte chu CM Zoramthanga tan mualphona tàwpkhâwk a nih avangin Assembly House aṭanga Lalduhoma paih chu phuba an lâk theihna leh an thenfai theihna kawng awmchhun a nih thute a sawi a ni.

Lalduhoma bàn a nih theih nan MNF MLA 12-in hèkna an thehlut a, thuthlukna siamtu Speaker pawh MNF tho a ni tih sawiin Lalnunmawia chuan, "Mahni chhungkaw tana hnawksak tak hêkna thu MNF MLA 12-te thlen hi tu nge lo hnâwl duh ang? Speaker Pu Lalrinliana Sailo hian Pu Lalduhoma hi disqualify lo se, amah zawk hi MNF party-in an disqualify nghalin a rinawm a, tuboh leh dolung karah an dah a ni,“ a ti a, MLA 12-te hêkna tihhlawhtlin ngêi chu MNF pa mawhphurhna a nih thu a sawi. 

ZPM Legal Board hotute chuan, Lalduhoma bàntirna tura Speaker-in dan a tlawhchhan leh Supreme Court thutlukna awm tawh chungchangte an sawifiah a, "Pu Lalduhoma hian Tenth Schedule (Anti Defection Law) para 2(2) a bawhchhe lo. Speaker-in a disqualified lai hian ZPM-ah hian enrolment a ti hauh lo a, member nihna eng mah a nei lo," an ti.

Lalduhoma court-a a kal loh chhan sawiin Lalnunmawia Pachuau chuan, "Court kal kan cho em em a, ruahmanna engkim kan siam tawh. Court proceeding chin hriat a ni lo a, court-a thên kualtir reng a, Serchhip bial mipuite MLA neih lohtir reng kha an duhthusam ni bera a lan avangin, bial ruak a rang thei ang bera hnawhkhah leh hi ZPM duh dan a ni ta zawk," a ti a; MNF-in hun rei tak bialtu MLA nei loa Serchhip bial dah an tumna game an tihtawp thu a sawi.

MLA aṭanga bàn a nih chungchangah stay order a awm ang tih hlauin MNF-in L Thangmawia, MLA hmingin High Court-ah Caveat Application an thehluh nghal thu sawiin Lalnunmawia chuan, "Heti taka Pu Lalduhoma’n stay order a hmuh an hlau kha a mak a, Serchhip bial mipuite uap lumtu MLA neih lohtir reng a, duh tâwka court case delay kha an tum ber a ni tih a chiang hle," a ti.