COVID-19: Mizoram dinhmun Hripui vei hmuh chhuah belh lo

March 28, Pathianni khan Mizoramah swab sample 238 endik ni mah se, Covid-19 vei hmuh chhuah a ni lo. Hripui laka fihlîm tawh nimina chhuahtir an awm lo bawk.

Pathianni khan ZMC laboratory leh TrueNAT-PCR hmangin swab sam­ple endik a ni lo a, Rapid Antigen Test hmangin Aizawl, Siaha leh Kolasib district-ahte sample 238 endik a ni.

Mizoramah Covid-19 vei mi 4,465 hmuh chhuah a ni tawh a, mipa 3,254 leh hmeichhia 1,211 an ni. Nimin tlai dar 5 thleng khan mi 4,428 (99.17%) chhuahtir an ni tawh a, mi 11 (0.25%) thi tawhin, enkawl mek mi 26 (0.58%) an awm. 

March 28, 2021 thlengin Mizo­ramah swab sample 2,51,302 endik a ni tawh a, chu'ng aṭanga Covid-19 positive hmuh tawh zat 4,465 chu 1.78% a ni. Hripui vei hmuh tawh zinga mi 2,128 chu Mizoram chhunga kái chhâwng an ni a, mi 2,337 chu Mizoram páwn aṭanga an rawn luh hnua hmuh chhuah an ni thung.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,661 hmuh chhuah a ni tawh a, TrueNAT-PCR hmangin 674 leh RAT hmangin 1,129 hmuh chhuah a ni tawh.