PAHOSS-ah cheng nuai 10-29 inkar dawng tur mi 168 thlan a ni tawh

Aizawl khawpuia traffic jam tihziaawmna tura sorkarin a kalpui mek, Parking House Support Scheme (PAHOSS) dawng tura Executive Committee-in a thlan tawh zingah, cheng nuai 10 leh nuai 29 inkar dawng tur mi 168 an awm. Mi 168 zingah MLA pakhat a tel a ni.

Vanglaini-in RTI Act hmanga a zawhna, UDPA department SPIO-in a chhànnaa a lan danin, PAHOSS hi ṭum thumah pek tur a ni a, hmasa berah 40%, a vawi hnihna leh vawi thumnaah 30% ve vea pek tur a ni. PAHOSS Executive Committee hi Chief Secretary kaihhruaiin kalpui a ni a, member pakua an awm.

PAHOSS sum hmanga in sakte chu a rei lo berah kum 10 tal garage atan hman tur niin, kum 10 hnuah chuan a neitute'n an duh angin an hmang thei tawh thung. LMV pakhat atan emaw, two wheeler paruk atan emaw Rs 1,00,000 pek theih a ni a, lirthei dah man chu AMC-in rate a bithliah anga lak tur a ni.

PAHOSS ṭanpuina dawng tura thlan tawh, cheng nuai 10-29 inkar dawng tur thlan zingah North Zone-ah mi 52 awmin, mimal in vek a ni a; South Zone-ah mi 66 awmin, Pachhung University College leh Bethlehem Veng Local Council an tel a, a dang chu mimal in vek a ni.

East Zone-ah mi 14 awmin, mimal in vek a ni. An zingah East Tuipui bialtu MLA Ramthanmawia a tel a, Zemabawk & Aizawl By-Pass Road péng (junction)-ah parking a siam dawn. Ani hi third batch niin, LMV 18 leh two wheeler 48 dah theihna tur a ni a, cheng nuai 26 dawng tura tih a ni. West Zone-ah mi 36 awmin, Chawnpui Branch YMA tih loh chu mimal in vek a ni.