KHAWTHLIR

Thisen pe
KṬP, Durtlang Branch chuan nimin khan thisen pek an huaihawt a, mipa 37 leh hmeichhia 12-te'n Synod Hospital blood bank tan thisen unit 49 an pe. HBK MMA Gym, Kulikawn pawhin State Kickboxing Championship-a pahnihna an nih lawm nan nimin khan Synod Hospital-ah hian thisen unit 14 an pe bawk a, petute mipa 13 leh hmeichhia pakhat an ni.

Holi hmang
Nimin kha Hindu kût pawimawh, Holi (rawng intheh kût) a ni a, India ram pumah lawm ṭhin a ni. Mizoramah chuan Covid-19 hripui léng avangin Holi hi a huhoa lawm a ni lo a, chhungkaw bila hmang eng emaw zat an 
awm thung.

DC-in khua fang
Khawzawl district bawrhsap Zothanmawia chuan Inrinni khan Khawzawl district chhunga khaw hrang hrang - Dulte, Kawlkulh leh Kawlkulh North-te a tlawh. DC hian khawtlang hruaitute kâwmin, an khaw dinhmun hrang hrang a enfiah a, khawtlang mamawh leh hmalak dan turte a sawipui a ni.

Lui hnár tifai
Champhai bawrhsap Maria CT Zuali hoin nimin khan Champhai khawpuia VC hrang hrangte'n Champhai khawpui tui tlan ber, Tuipui lui leh a fintu kawrte tihfai hnatlang an nei. Hnatlangah hian Tuipui lui hnár,  Champhai Kanan Veng chhung tui luankawr, Dinthar Veng kài, New Champhai - Tuipui lei, Zote kài leh Keilungliah luia plastic/ polythene leh hnawmhnawkte an 
tifai a ni. 

Ventilator hmantir
State Referral Hospital-ah Covid-19 vei mi pakua enkawl mek a ni a, an zinga pakhat chu ICU-ah awmin, ventilator hmantir mek a ni. SRH-ZMC Bulletin tarlan danin, hripui vei SRH-a enkawl mek mi pakua zinga pakhat chu nimina dah luh thar a ni a; ICU-a awm mi pakhat tih loh chu Isolation ward-ah awmin, harsatna lian tham nei an awm lo.