NGO Coordination-in Total bandh an sût

Tlawmngai pawl panga telna NGO Coordination Committee chuan April 11, 2019-a Lok Sabha inthlanpui neih tur boycott leh April 8, 2019 aṭanga tiam chin awm loa Mizoram puma total bandh huaihawt an tum chu sût a nih thu, April 3, Nilaini zan khan an puang.

April 3 zana NGO Coor­dination Committee (Joint NGO) thuchhuah chuan, Nilaini zan dar 8:30 khan Joint NGO hruaitute chu an ṭhukhawm a; sorkar hotute nen an indâwr hnuah, an thil duh angte sorkarin tihhlawhtlin a tum nia an ngaih avangin inthlan boycott leh April 8 aṭanga total bandh huaihawt an tum chu sût an rêl tih a tarlang.

Joint NGO meeting chuan, "Tripura Transit Camp-a Tuikuk awm mek, Mizorama electoral roll-a chuangte Election Commission of India (ECI)-in duhsak bikna a lantir duh loh nana MP Election 2019 boycott leh total bandh Dt. 8.4.2019 aṭanga neih a lo tum tawh chu, Mizoram sorkar aiawha Mizoram Chief Secretary-in ziaka ngenna a rawn thlen (Vide No. J. 11029/1/2019 - HM (Bru) Dated 3rd April, 2019) chu ngaihtuahin, thu tlingah a pawm a, Tuikukte vanga harsatna kan tawh ṭhinte hi a tawp ngei theih beisei a ni," a ti.

NGO Coordination Co­mmittee chuan, Tripura-a awm mek Bru zinga Mizorama lêt duh lote ngaihsak zui tawh lo turin Mizoram sorkar leh Ministry of Home Affairs (MHA) ten hmalak nghal an tum avang leh Bru lak let hna pawh a tawp tak takna atan kum 2019 chhung ngeia zo fel hman tura hmalak an tum tih an tarlang a; lawmawm an tih thu an sawi.

Joint NGO chuan, "Sorkar hmalak tumna hi NGO Coor­dination Committee meeting chuan ring tawkin, MP Election 2019 boycott a tum leh, April 8 aṭanga tiam chin awm loa total bandh huaihawt a tum chu thu leh awm hma chuan ṭhulh turin a rel ta a ni. Mizoram sorkarin hmalak a tumna hi a hlawhtlin ngei theih nan chak taka hma la turin Mizoram sorkar kan beisei nghal bawk," an ti.

Joint NGO thuchhuah chuan, hmalak an tumna kawnga theihtawp chhuaha an thuchhuakte bawhzui a, ṭha­hnem­ngai taka a hlawhtlin theih nana thâ leh zung sênga hma latu YMA sub-hqrs., group leh branch leh NGO hrang hrang te, an thawhpui Central YLA, MTP Gen. Hqrs. ten an thlawpnaahte lawmthu an sawi tak meuh tih a tarlang bawk.

Joint NGO-in April 8 aṭanga tiam chin awm loa total bandh huaihawt a tum chungchangah hian YMA Sub-Headquarters, Kolasib chuan April 2 khan Central YMA hnenah lehkha thawnin, total bandh nei tura thutlukna siam tawh chu ngaihtuah nawn leh turin an ngen a ni.

Hetih lai hian, social media hrang hrangah pawh total bandh nei tura Joint NGO-in thutlukna an lo siam tawh chu ngaihtuah chian ṭha tih thu leh fimkhur a ngaih thu sawitu an tam hle nia thu dawn a ni bawk.