Vote thlâk turin mipui sáwm

Chief electoral officer (CEO) Ashish Kundra chuan April 11, 2019-a Parlia­ment-a Mizoram aiawh tur thlanna leh Aizawl West-I Assembly bye-election neih turah inthlanna felfai leh muanawm a awm theih nan Mizorama voter zawng zawngte thawhpuiah a sáwm a; voter-te chu vote thlak vek turin a ngen bawk.

Ashish Kundra chuan, inthlan vote thlak ni-ah vote thlak turte chu khawmuang lo leh chawhnu tlai tawh lama chhuak chauh lo a, chawhma, hun thâwl laia vote thlak turin voter-te a ngen a; inthlan kaihhnawiha mawhphurhna nei reng reng chu an mawhphurhna ngai pawimawh tur leh hlen chhuak ṭheuh turin a chah.

CEO chuan, polling official-te zinga zu in mi an awm a nih pawhin, inthlana an duty lai chuan zu in phal loh tawp a nih thu a tarang a; inthlanna atan khawl (EVM leh VVPAT) hman a ni dawn tih sawiin, "Vote thi emaw, vote thlak sual emaw a awm loh nan a hmehna lai turte hriat chian tum tur a ni a, Election department leh branch-a thawkte engtik lai pawhin zawh chian theih reng a ni," a ti.

Inthlan tikhaihlak thei thil reng reng laka inthiar fihlim tura mi tin chahin, "Chutiang thil ti emaw, tih tum emaw kan hriat pawhin thawhpui lo ila, thuneitute hnenah hriattir mai zawk tur a ni ang," a ti a; inthlannaa vote thlak chu voter tinte chanvo, tumahin an chhuhsak theih loh a ni tih a tarlang.

CEO Ashish Kundra chuan, MLA inthlanah aiin Lok Sabha inthlanaah vote tla a tlem fo ṭhin tih sawiin, "Tun ṭum chu tun hma MP inthlannaa vote tla aia tam a tlak theih nan vote nei zawng zawng thawk chhuak ila, bung thar kai turin i thawk ang u," a ti.