MP-in Lalnghinglova vote turin mipui a sáwm Rosanga tling se, NDA lamah a ṭhu ang - CL Ruala

Mizoram Lok Sabha MP ni mek CL Ruala chuan, kum 10 chhung Lok Sabha MP ni tura thlang tlingtu Mizoram mipui chungah lawmthu a sawi nawn leh a; April 11, 2019-a Lok Sabha inthlanpui awm turah, MNF candidcate C Lalrosanga chu tling ta se, BJP kaihhruai NDA lamah a ṭhut ngei a rinawm avangin, Congress leh ZPM thlâwp candidate Lalnghinglova Hmar vote turin mipui a sáwm.

CL Ruala hian nimin khan Congress Bhavan-a MPCC President pisaah thuthar thehdarhtute kâwmin, tuna Lok Sabha term chu May 23, 2019-ah an term a tàwp dawn thu leh tuna Lok Sabha 16-na chu June 3-ah ṭhiah tawh tur a nih thu a sawi a; kum 2009 leh 2014 inthlan chungchangah, "Kum 2009-ah vote nuai khat chuangin ka chak a, khaw pangaah chuan vote awm zawng zawng ka hûi vek a, ka lawm hle. min duhsaktute chungah lawmthu ka sawi nawn a ni," a ti.

Lok Sabha pakuana, kum 1991 aṭangin MP-te chu hlawm pahnih - secular group leh communal group-ah a inṭhen tih sawiin CL Ruala chuan, "Kei chu Lok Sabha 15-na leh 16-naahte khan secular lam kaihruaitu Congress party lamah ka ṭhu a ni," a ti. BJP sorkarah Kristiante leh Mosolman-te'n harsatna an tâwk nasa tih sawiin, "India rama piang sakhua a ni ve lo, tih hi an ṭanna a ni," a ti a; 16th. Lok Sabha chhunga bye-election-ah BJP-in member an hloh zel thu a sawi.

Citizenship Amendment Bill (CAB) chungchangah CL Ruala chuan, sakhuanaa innghat a nih avangin buaina a awm phah tih a sawi a; CAB chu kum 2016-ah Parliament-ah put luh thu a ni tih sawiin, "Opposition-te'n kan hre lâwk lo. An put luh tirh aṭangin kan do nghal. Lok Sabha-ah kan intam hleih si a, kan hneh dawn lo tih kan hre chiang, study team din kan rawt a, a tihkhawtlai dan kan zawng ringawt mai a ni... Kum 2018-ah CAB pharh leh a nihin kan pawmpui duh lo a, an pass laiin House kan chhuahsan a ni," a ti.

Lok Sabha MP chuan, "CAB hi BJP national agenda a ni a, an theih hun hunah tihnun leh an tum. CAB aia hlauhawm zawk, 'One India, one religion' atan India ram siam an tum a ni," a ti a; chumi dodal tur chuan Kristiante'n ṭan an lak a ngaih thu a sawi. CL Ruala chuan, MNF MP candidate C Lalrosanga chu tling ta se, a ṭhutna lam tur an sawi chian loh rualin, NDA lamah a ṭhut ngei a rinawm thu a sawi a, "Tunah hian Parliament hi hlawm hnih, communal leh secular angin kan inṭhen hlawk mai. MNF candidate hi tling ta se, NDA communal lama ṭhu chunga CAB dodal tura a au dan tur ka hrethiam lo," a ti.

Tun ṭuma Lok Sabha inthlan tur chu CAB duh lohna lantirna hun ṭha ber a ni tih sawiin CL Ruala chuan, "April 11-ah hian hnam chhan hnatlang kan nei dawn. BJP leh an thawhpuite hi chu Kristiante nêkchêptu an ni a, kan vote loh hrim hrim a ngai a, kan paih a ṭul tawh hle a ni," a ti a; "Pu Lalnghinglova Hmar hi secular force lama ṭhu tur a ni," tiin, BJP/NDA paih an nih theih nan Lalnghinglova Hmar vote tura mipui a sáwm a ni. Mizoram Lok Sabha MP chuan, kum 84 mi a ni tawh tih sawiin, inthlannaah chuh ve a tum tawh loh thu a sawi a; chutih rualin, an party-in a mamawh chhung chuan an party-ah nihna neia a awm tur thu a sawi thung.