MPF-in mipui an ngen

Mizoram People Forum (MPF) General Headquarters hruaitute chuan, Lok Sabha in­thlanpui neih tur chu Mizorama inthlan dang ang bawkin inthlanna thianghlim, rálmuang leh zalen a nih ngei an beisei thu an sawi a; chutiang a nih theih nana theihtawp chhuah tláng turin Mizoram mipui an ngen.

MPF hruaitute hian nimin khan Aizawl Press Club-ah thuthar thehdarhtute an kâwm a; MPF vice president Rev. K Lalrinmawia chuan, tuna Lok Sabha inthlan­pui neih tur chu Mizorama election obser­ver tura rawn kalte nen an sawiho tawh tih sawiin, "MPF hnathawhte kan sawiho a, Mizoram inthlan dan hi ram pum entawn tlakah an ngai a ni," a ti a, MIzoram inthlanna thianghlim tak awm ṭhin chu MPF hlawhtlinna bik ni loin, Mizo mipui hlawhlinna, kohhran leh NGO hrang hrangte thawhhona rah a nih thu a sawi.

Rev. K Lalrinmawia chuan, November 2018-a Mizoram Assembly general election-ah MPF beisei ber inthlanna rálmuang leh muanawm a awm tih sawiin, an lawm thu a sawi a, "Assembly inthlan ang thoin MP election-ah pawh thianghlim taka inthlan kan neih kan beisei. Inthamna, invauna leh inthlanna tibâl theitu reng reng a awm loh kan duh. Chutiang tur chuan mipuite'n ṭan la ila, political party-te'n sum sem lo ila, mipui pawhin sum beisei lo ila kan duh a ni," a ti.

MPF Vice President chuan, Lok Sabha inthlan lo awm turah vote thlak ṭheuh turin Mizoram mipui zawng zawng an ngen tih a sawi bawk.

Press meet-ah hian MPF general secretary Rev. R Lalnuntluanga'n MPF leh political party hrang hrangte thawh­hona thuthlunga point pawimawh zualte a tarlang. Chutih rualin, thawhhona thuthlung chu ennawn a ni dawn tih sawiin, MPF adviser Vanlalrema Vantawl chuan, "Ennawntu turte pawh an inruat a ni tawh," a ti a; thuthlung ennawnna ang chu tuna Lok Sabha inthlan turah erawh hman a ni dawn lo tih a sawi.