Lai fate hi MNF vau zâm chi kan ni lo - C Ngunlianchunga

Lawngtlai West bialtu MLA C Ngunlianchunga chuan, Mizoram state-a MNF sorkar apiangin Lai Autonomous District Council (LADC) hruaitute an vau tih sawiin, "Lai fate hi MNF vau zâm chi kan ni lo," a ti a; MNF sorkar chu CADC sorkar ding lai ṭhiah tumah a puh.

Nimina Lawngtlai Areopagi-a Lok Sabha inthlan campaign-ah C Ngunlianchunga chuan thu sawiin, tun hnaia chief minister Zoramthanga'n Lawngtlai a tlawh ṭumin CM a nih ang leh finance changtu a nih angin inthlan zawhah LADC chhui tura hma a lak tur thu a sawi chungchang a sawi lang a, "CM a nihna hmachhuanin LADC-ah hleilen a rawn tum maw, Lai fate hi vau zâm chi kan ni lo," a ti a; MNF sorkar apianga Lai fate chunga hleilen ṭhin chu an duh loh thu a sawi.

C Ngunlianchunga chuan, autonomous district council-te chu India danpui hnuaia rorelna hran neia awm an nih thu sawiin, "Tun hma khan hêkna kan tawh avanga Governor thutlukna pawh High Court chuan a lo hnâwl tawh. Pu Zoramthanga hi CM ni mah se, dan chunga lêng a ni bik lo. Lai fate zâm suh u, hlauh tur a awm lo, tute pawh hi dan hnuaia awm vek kan ni," a ti.

Lawngtlai West Bialtu MLA chuan Pathianin ram leh hnam pein chumia roreltu turte thlan an nih ṭhin thu sawiin, "MNF sorkar apiangin LADC sorkar an ṭhiat a, tunah chuan hetianga tih hi kan duh bik lo. Tunah pawh LADC sorkar ṭhiah tumin hman an la mek. An nawm an mâka MNF hian min tih tur kan ni lo," a ti a; MNF thu thua awm lo turin CADC mipuite a chah.

Laifa te zinga MNF MLA neih chhunin duhsakna a chang lo tih sawiin Ngunlianchunga chuan, "Hming phuahchawp department pakhata vice chairman a ni a, hetiang hi MLA ni lo zingah pawh an awm nual. Congress sorkar hnuaiah chuan keini tak ngial pawh minister of state-ah dah kan ni. MNF hian Lairam min hmangaih lohzia a lang chiang hle. Lawngtlai East Bialtu MLA hi ka khawngaih thlâwt a ni. MNF vote kan ba lo," a ti.

C Ngunlianchunga chuan, "MLA kan inthlang a, MNF-in sorkarna an siam. Tunah chuan a dang daih, MP inthlan kan hmachhawn dawn a, India ram hruaitu tur kan thlang dawn a ni," a ti a; MP inthlan turah hian Mizo ram, hnam leh sakhaw himna tur ngaihtuah a ṭul thu a sawi a ni.